Alternativet: Ministeriuffik Naalagaaffeqatigiinni paarlakaanneqassaaq

Naalagaaffeqatigiinni Atlantikup avannaanut ministereqartariaqarpoq, taannalu Kalaallit Nunaata, Savalimmiut Danmarkillu akornanni paarlakaanneqassaaq. Partiip Alternativetip Danmarkimi naalakkersuisut siuttuuffigilissagaluarunigit tamanna anguniarpaa.

Partiip naalakkersuisuutitaqarnermut pilersaarutaani tallimanngorpat pisortatigoortumik saqqummiunneqartussani tamanna atuarneqarsinnaavoq.

Alternativetip Nunanut allanut tunngasunut Illersornissamullu ministereqarfiit ataatsimut kattunniarpaat, taannalu pingasunik ministereqartinneqassaaq: Nunanut allanut tunngasunut ministeri, ineriartortitsinermut nunarsuarlu tamakkerlugu naapertuilluartitsinissamut ministeri aamma Atlantikup avannaanut ministeri.

Atlantikup avannaanut ministereqarfik Kalaallit Nunaata, Savalimmiut Danmarkillu akornanni paarlakaanneqassaaq naalagaaffeqatigiillu soqutigisaannik isumaginnittuussalluni.

AAMMA ATUARUK Inuit Ataqatigiit vil ikke pege på statsministerkandidat

- Naalagaaffeqatigiinnitsinni ataqatigiinnitta nukittunerulersinnissaa pisariaqartipparput, aamma suleqatigiinnerup nukittunerulersinnissaa pisariaqartipparput. Savalimmiunni Kalaallit Nunaatalu naammaginartumik sunniuteqaqataatinneqannginnertik ataatsimiititalianilu oqallittarfinnilu assigiinngitsuni peqataatinneqannginnertik oqaatigisarpaat, partiip nunatsinnut tunngasunut oqaaseqartartua, Roger Matthisen, KNR-imut oqarpoq.

- Taama iliornikkut oqarusuppugut: ’Tamanna ilumoortortaqarsinnaavoq, pisarsimasummi kingumut qiviarnerini aamma takusinnaavarput tamannalu aaqqiissuteqarfigerusupparput.’ Pissaaneqarnerulernikkut aamma annertunerusumik akisussaaffeqartoqalissaaq, oqaaseqartartoq oqarpoq.

Suli aaqqiagiinngissuteqartoqarsinnaasoq

Ministeriuffik paarlakaanneqartumik pilersitsinikkut Naalagaaffeqatigiinni aaqqiagiinngissuteqarnernut tamanut aaqqiissutaasinnaanngitsoq nassuerutigaa. Pingaartumik nunat pingasuusut tamarmik immikkut nunanut allanut tunngasunut suli ministereqartillugit.

Aamma Atlantikup avannaanut ministeriuffiup paarlakaanneratigut nunat ataasiakkaat namminneq soqutigisaminnik pingaartitsineroratarsinnaapput.

AAMMA ATUARUK Folketingimi partiit affaasa tunngaviusumik inatsit allanngortikkusunngikkaat

- Tamatumanili kaammattuisariaqarpugut ministeriuffiullu piginerani naligiimmik suleqatigiittoqarnissaa Naalagaaffeqatigiinnerullu eqqarsaatigineqarnissaa neriuutigalugu, Roger Matthisen oqarpoq.

Alternativetip ministereqarfinnik nutaanik pilersikkusutai katillugit 15-iupput. Ministeriunerup ministereqarfia aamma Nunanut allanut tunngasunut ministereqarfik kisiartaallutik maanna taaguutigisatik pigiinnassavaat.

Piujuartitsinissamut saqinnissamut ministereqarfik qitiulluinnartumik inissisimatinneqarpoq, ministereqarfiillu allat siunnersuutigisaat tamaasa akuersissuteqarfiginissaat ministereqarfimmit tassannga peqataaffigineqartassapput.

Alternativetip siuttua, Uffe Elbæk, Folketingimut qinersisoqalerpat Danmarkimi naalakkersuisunngortussat siuttuuffiginissaannut imminut piukkulluni aasaq nalunaarutigaa.