Ministeri pineqaatissinneqarsimasunut Kangerlussuarmi inissiisarfiliorumanngitsoq
Kangerlussuarmi inissiisoqartaleqqinnissaa ilimananngilaq.
Tamanna inatsisilerinermut ministerip, Nick Hækkerupip (S), Folketingip nunarput pillugu ataatsimiititaliaanut allakkamini erseqqissarpaa.
Inuit 42-it pineqaatissinneqarsimasut inissinneqarnissamut novembarip 19-ani 2020-mi utaqqisuupput. Taakkunanngali 21-it decembarimi 2020 aamma ukioq manna januaarimi inissinneqarnissamut aggersagaasut, inatsisilerinermut ministeri ilisimatitsivoq.
AAMMA ATUARUK Kinguaassiutitigut pinerluuteqarsimasut inissiisarfimmiilernissaminnut inuiaqatigiinni akuusartut
Pineqaatissinneqarsimasullu utaqqisut 21-iinnaatillugit inissiisarfiugallartussamik Kangerlussuarmi ammaaqqinnisssamut pissutissaqanngitsoq, taanna naliliivoq.
- Pineqaatissinenqarsimasut utaqqisut maanna amerlassusaat pissutigalugit, Kangerlussuarmi inissiisarfiup ammaqqinnissaanut tunngavissaqanngitsoq, Pinerluuteqarsimasunut isumaginnittoqarfik naliliivoq, taanna nunarput pillugu ataatsimiititaliamut allappoq.
Kangerlusuarmi illorsuit assigiinngitsut 2007-imi, 2009-mi 2013-imilu inissiisarfiugallartutut atorneqarnikuupput. Piffissani taakkunani pineqaatissinneqarsimasut 250-iniit 300-sarsimapput. Maannali tamaanngilaq.
Nick Hækkerup nangippoq, inissiisarfimmik allamik pilersitsinissamut nunatsinni Danmarkimiluunniit naammattunik aamma inuttassaqanngitsoq.
Partit amerlanerusunik inissaqartitseqqusisut
Pineqaatissinneqarsimasut 65-it inissinneqarnissamut utaqqisut, KNR septembarimi allappoq. Taakkunani 25-t kinguaassiutitigut pinerliiisimasutut eqartuussaasimasuupput. Inisiisarfiit nuna tamakkerlugu 154-inik inissaateqarput.
Ilaatigut Demokraatit tamaammat amerlanerusunik inissaqalersitseqqusipput, IA Kangerlussuami inissiisarfiugallartumik aammaaqqeqqusisut, minnerusumillu pinerlussiomasunut singernequteqartitsisaleqqusillutik.
Nunattalu isorartussususiata, internettip attaviliinerata killeqassusiata pinerlussimasunillu isumaginnittoqarfiup sulisussaaleqinerata singernequteqartitsisarnissaq pineqaatissiissutaasinnaajunnaarsingajakkaa, misissuinerit arlallit takutippaat.
AAMMA ATUARUK Singernequteqartitsisalernissaq ilimanaatikittoq: Nunatta isorartunera sakkortuumillu pineqaatissinneqarsimasut aporfiupput
Utaqqisoqarneralumi ajornartorsiutaasoq, danskit inatsisilerinermut ministeriata nassuerutigaa. Tamatumunnga peqqqarniinnerusumik pinerlussimasunut inissiisarfioreertuni amerlanerusunik inissaqalernisssa aaqqiissutissaavoq.
Nick Hækkerupip oqarnera naapertorlugu inatsisilerinermut ministeeqarfiup inissiisarfinni amerlanerusunik inissaqalernissaa misissorpaa.
