Mimi Karlsen erseqqissaavoq: Danmarkip aningaasaliissutai meeqqanik inuusuttunillu ikiuinermut atorneqarput

Danmarkip aningaasaliissutai 80 millionit koruuniusut nunatsinni meeqqanik inuusuttunillu ikiuinermut toqqaannartumik toqqaannanngitsumilluunniit atorneqartut, ilaqutariinnut naalakkersuisoq isornartorsiorneqareerluni erseqqissaavoq.
Danskit naalagaaffiata aningaasaliissutai 80 millionit koruuniusut nunatsinni meeqqanik inuusuttunillu ikiuinermut toqqaannartumik toqqaannanngitsumilluunniit atorneqartut, Meeqqanut, Inuusuttunut Ilaqutariinnullu Naalakkersuisoq Mimi Karlsen (IA) erseqqissaavoq. Assi © : KNR
februaarip 02-at 2023 07:07
Nutserisoq Hanne Petersen

'Taakku 80 millionit koruunit soorunami meeqqanut atorneqassapput'.

Meeqqanut, Inuusuttunut Ilaqutariinnullu Naalakkersuisup, Mimi Karlsenip (IA), tusagassiuutinut nalunaarutaa taama qulequtaqarpoq. 

Aningaasaliissutit taakku meeqqanik inuusuttunillu sumiginnagaasunik kinguaassiuutitigullu atornerlunneqarsimasunik ikiuinermut toqqaannartumik toqqaannanngitsumilluunniit atorneqartut, taanna erseqqissaavoq.

AAMMA ATUARUK Aaja Chemnitz: Penge til børn er strandet i Socialstyrelsen

- Tassa maanna inernernik takusaqarsinnaalereerpugut. Sumiginnaasarnermik akiuiniarnermi meeqqanillu kinguaassiuutitigut atornerluisarnerup akiorniarnerani annertuumik allorialeruttorpugut, Mimi Karlsen oqarpoq.

Tamatumunnga atatillugu suliniutinik 16-inik 2020-mi pilersitsisoqartoq, taanna erseqqissaavoq: Ilaatigut meeqqanut unnuisarfiit ilaartorput, isumaginninnermik suliallit pikkorissarput aamma "Klinik Killiliisa"-qalerpoq, tassa inersimasunik meeqqamut inuusuttumulluunniit kinguaassiuutitigut killissamik qaangiisumik pissuseqartartunik kaatsorsaaveqalerpoq.

Parteeqataata isornartorsioraa

80 millionit koruunit aningaasaliissutaareersut ilarpassui meeqqanik ikiuinermut atorneqaratik allaffissornermut atorneqarsimanerarlugit parteeqataa Folketingimi ilaasortaasoq, Aaja Chemnitz, isornartorsiuereersorlu, Mimi Karlsen tusagassiuutinut taama nalunaarpoq.

Sammisaq naatsumik

2019-imi Naalakkersuisuusut Inatsisartunit danskit naalakkersuisuinut nunatsinni meeqqanut inuusuttunullu suliassaqarfimmi suliniutinut ikiorneqarnissamik qinnuteqaqquneqarput. 

 

DR-ip piviusulersaarusiaa "Byen hvor børn forsvinder" saqqummiunneqareersorlu taamaalioqquneqarput.

Folketingi siullermik 5 millionit koruuninik Tasiilami ikiuigasuarnissamut aningaasaliissuteqarpoq.


Tamatuma saniatigut 80 millionit koruuninik 2020-imiit 2023 ilanngullugu atugassanik aningaasaliivoq.
 

Tassa nunarput 69,9 millionit koruuninik aningaasaliissutinit taakkunannga 80 millionit koruuniusunit pissarsivoq. Aningaasaliissutit taakku sinneri 10 millionit koruunit missarluinnaanniittut nunatsinni suliniuteqarnermut ikiuinermilu nalunaarsuinermut atugassatut Danmarkimi Socialstyrelsenimut tupput.

 

Aamma 11 millionit koruunit kommunit isumaginnittoqarfiini sullissisut qarasaasiatigut nalunaarsuiffeqatigiiffittaarnissaannut atugassatut nunatta karsianit illikartinneqarput.

- 80 millionit koruuninit taakkunannga aningaasaliissutaareersut ilarpassui Isumaginninermut Aqutsisoqarfimmi Nuummiittumi, sulisorpassuaqaleriataarsimasumut, atorneqarsimapput. Aningaasaliinermilu tamanna siunertaanngikkaluarpoq, Aaja Chemnitz Folketingimi januaarimi ammaanersiorluni oqallinnermi oqarpoq.

Isumaginninnermut Aqutsisoqarfiullu kisitsisaatai naapertorlugit tassani sulisut 2018-imi 46-sut 2018-imi 118-inngorsimapput.

Tamannali nassuiaatissaqarluartoq, Mimi Karlsen oqarpoq. Taassumami oqarnera naapertorlugu meeqqanik inuusuttunillu ikiuinerunissamut suliniutit amerlanerpaartaat aqutsisoqarfimmi pilersinneqartarput. Aamma aqutsisoqarfik kommunit isumaginnittoqarfiini sullissisunik pikkorissaanermik aaqqissuussisarpoq, meeqqanik ikiuigasuarnermi angalasartoqatigiittoqartitsivoq oqarasuaatikkullu siunnersuisarfik Tusaannga akisussaaffigalugu.

Suliniutinillu nutaanik 16-iusunik pilersitsisoqarnerani amerlanerusunik sulisoqarnissaq pisariaqarpoq. Suliniutaagallartunik suliallit uani aamma pineqarput. 

Mimi Karlsenillu tamanna iluatsissimanerarpaa. Nutaanimmi suliniutilerisussanik naammattunik sulisussarsinngitsoornissaq 2020-mi isumakuluutigaat.

- Aqutsisoqarfik - nammineq sulisumi qaavatigut - pilersaarusiornernut atorfinnut sulisussanik pilerisutsitsilersitsisinnaalersimavoq. Taamatut sulissuteqarnitsinni inernernik angusaqarnissaq tunaartarineqarnikuuvoq, taanna oqarpoq. 

Taassuma oqarnera naapertorlugu Isumaginninnermut Aqutsisoqarfimmi pilersaarutaasimasut naammassippata sukataarutiginikuusat qanoq isillutik attatiinnarsinnaaneritik qanorlu ingerlatiinnarsinnaaneritik maannangaaq isumaliutersuutigisariaqarput.

Pikkorissaanerit sungiusaanerillu aningaasartuuteqarfiunerpaasut

Meeqqanik ikiuigasuarnermi angalasartoqatigiit aningaasartuuteqarfiunerpaapput. Taakku meeqqanik inuusuttunillu kinguaassiuutitigut atornerlunneqarsimasunik ikiuinermik angajoqqaanut, angajoqqaarsianut isumaginninnermillu sulialinnut pikkorissaasarput.

Taakku 2021-imi pilersinneqarput, ukioq mannalu ilanngullugu 13,9 millionit koruuninik aningaasartuuteqarfigineqarlutik. 

Aappaattut aningaasartuuteqarfiunerpaaq tassaavoq, kommunit isumaginnittoqarfiini suliat naammassineqanngitsut ikilisinnissaat, tamatumunngalu aningaasartuutigineqartut 7,1 millionit koruuniupput. Isumaginninnermi siunnersortit 19-it qanigisaasunillu katsorsaasut Danmarkimeersut 16-it tassani suleqataapput.

Taakku kommunit pingasut illoqarfiisa ilaat arfineq-pingasut tikippaat. Aamma allanik kommunimut allamut tikittoqassaaq.

AAMMA ATUARUK Ataatsimut isigalugu: Meeqqanut inuusuttunullu atugarliortunut atatillugu innersuussutit 16-it

Ilungersunartoqarsimaqisoq, Mimi Karlsenip miserratiginngilaa. Ukiualunnguit iluanni pilersaarummik taama annertutigisumik anguniagaqarluartigisumillu aallartitsinermi ilungersunartoqaqaaq sulilu ilungersunartoqaqaluni. Tamanna avaqqunneqarsinnaanngilaq, taanna oqarpoq.

- Pilersaarutit tulleriiaaginnaavissut naammassisassat takkussuuttarnerat pissutaallutik, kommunit artukkerneqarsimasutut misigisarsimapput. Suleqatigiinneq ataqatigiissaarinerlu immaqa pitsaanerusinnaasimagaluarput. Tamatta tamanna ilinniarfigisinnaavarput, taanna oqarpoq. 

- Kisianni suna iluatsinnersoq maluginiassavarput. Kalaallit Nunaanni meeqqanut inuusuttunullu atugarliortunut pitsaanerusumik suliniutinut suut siuariartuutaanersut maluginiassavagut. Meerartagut, inuusuttortagut ilaqutariillu atugarliortut pillugit taamaasiussaagut, Mimi Karlsen oqarpoq.