COP21 Silap pissusia pillugu ataatsimeersuarneq avatangiisit pillugit ataatsimiititaliap isumassarsiorfigigaa
Tassani siulittaasuata Michael Rosingip misigisimavaa nunat allamiut naapinneri Kalaallit Nunaanni politikkissamut isummersorfiusinnaasut.
- Silap pissusaata allanngoriartorneranut nunarsuarmiut isumaat allanngoriartortoq nammineq inuttut misigisimavara. Siornatigut ajornartorsiutaanersoq iluamik ilisimanngikkaluariarlugu tamatta paasilerparput ilumut ajornartorsiutaasoq. Aaqqiisariaqartugullu.
Aamma atuaruk Silap pissusaa pillugu ataatsimeersuarnermi ineriartortitsineq Vittusip anguniarpaa
Aamma atuaruk Aleqa COP21-mi issittoq pillugu pisut annersaanni oqalugiartut pingaarnerit ilagissavaat
COP21-imi Parisimi alaatsinaatsutut peqataasoq, Inatsisartut Avatangiisinut ataatsimiititaliaani siulittaasoq Michael Rosing taama oqarpoq.
- Nunani Avannarlerni inatsisartunut ilaasortat maani akornanniippugut. Tyskland Bangladeshilu oqaloqatigaavut. Bangladesh tassaavoq nunarsuarmi klimap allanngorneranit eqqugaanerlunnerpaanut ilaasoq, taamaattumik qanoq iliornersut tusassallugit assut soqutiginarpoq.
Naak Bangladesh Kalaallit Nunaanniit ungasikkaluaqisoq, nunaallunilu ineriartortoq aamma Kalaallit Nunaannut assingusortaqarpoq.
- Kalaallit Nunaat suliffissuaqarfiullunilu aamma arlalitsigut ineriartortuuvoq. Avinngarusimasorpassuarnut attaveqaateqanngilaq, Bangladeshimilu assingusunik unammilligassaqarput, soorlu nukissiuutit, eqqagassat assigisaallu eqqarsaatigalugit.
Aamma atuaruk ASSIT COP21-qarnerani sermit saqqummersinneqartut aakkiartorput
Tassalu nunanik allanik naapitsinerup silap pissusaata ataatsimeersuaatigineqarnera qaangiuppat Inatsisartuni sulinermut sunniuteqarsinnaavoq.
- Isumaqarpugut Kalaallit Nunaat arlalitsigut silap allanngoriartornera akiorniarlugu ajunngitsunik suliniuteqarsinnaasoq, ilutigitillugulu aningaasanik ileqqaartoqarsinnaalluni. Nukissiutinik atueriaaserput assersuutaasinnaavoq. Ataatsimiititaliatut angerlarutta Inatsisartuni oqaluuserisassanngortitserusoqaagut.
Naalagaaffiit Peqatigiit silaannaap allanngoriartornera pillugu Parisimi ataatsimeesuartitsinerat tallimanngorpat naammassissaaq, nunallu peqataasut malitassaminnik CO2-mik aniatitsinermik annikillisitsinissaminnik isumaqatigiissuteqassapput.
