Mette Frederiksen peqatigalugu Ilulissanit tusagassiortunik katersortitsinissaq taamaatiinnarneqartoq
Ministeriuneq, Mette Frederiksen Naalakkersuisut siulittaasuallu Múte B. Egede Ilulissanit nalunaaqutaq arfinernut tusagassiortunik katersortitsisussaagaluarput
Tamannali taamaatiinnarneqarpoq.
Naalakkersuisut siulittaasui marluk tusagassiortunik katersortitsinnginnerminni Ilulissani umiatsiamik angalaarput.
Umiatsiamilli angalaarneranni tusagassiortunik katersortitsineq umiatsiamit ingerlanneqassasoq aalajangerneqarpoq.
KNR umitsiamik angalaarnermi ilaasoq taamaattumik tusagassiortunik katersortitsinermik takutitsisinnaanngilaq, tusagassiorfiummi tassanngaannartumik allannguineq piareersimaffiginngilaa.
Múte B. Egede: Avatangiisit tunuliaqutaralugit pitsaanerpaagami
Tusagassiortunik katersortitsineq silap pissusanut tunngassuteqartoq umiatsiami nalunaaqutaq 16.30-p missaani ingerlanneqaannarpoq.
Naalakkersuisut siulittaasuata, Múte B. Egedep pilersaarutinik allannguineq silap pissusiata sammineqarnerani avatangiisit tunuliaqutarissallugit pitsaanerunerarlugu nassuiaatigaa.
Apeqqut: Pilersaarutit malillugit tusagassiortunik Hotel Arcticimi katersortitsisussaagaluarpusi, tamannali Ilulissat kangerluanut nuupparsi. Sooruna taamaaliorpisi?
- Taamaaliorpugut avatangiiseq tunuliaqutarlu taama ittoq silallu pissusiata allanngoriartorneranik tunngasorujussuarmik Ilulissaniinnerput sammisaqarfigigatsigut, tunuliaqutaq taanna aallaavigalugu pissusissamisoornerpaatut isigigatsigut, Múte B. Egede oqarpoq.
Nutaarsiassaqartitsivimmi pisortap, Alice Sørensenip umiatsiamit tusagassiortunit katersortitsinerup aallakaatinneqarnissaa periarfissaannginnerarpaa:
- Piareersimaffigisinnaasagut annertugaluaqaat, tusagassiineq, teknikki nutserinerlu eqqarsaatigalugit, tusagassiortunilli katersortitsineq umiatsiami imaanilu attaviluttumi ingerlanneqarpat allannguinerlu aallakaatitsinissamut qanippallaarpat toqqaannartumik aallakaatinniarnera ajornakusoorpoq.
Ilulissanit tusagassiortunik katersortitsineq Hotel Arcticimi pisussaagaluarpoq, taannalu danskisut kalaallisullu nutserneqartussaagaluarpoq.