EU-p allaffia nutaaq: Mette Frederiksen aamma Ursula von der Leyen Nuummukalersut

Europakommissionip siulittaasua, Ursula von der Leyen Danmarkimi ministeriuneq Mette Frederiksen peqatigalugu nunarput Savalimmiullu sapaatip akunnerata tulliani tikieraassavai.

Europakommissioni tusagassiuutinut nalunaarummi allappoq.

Taakku Savalimmiunut marsip ulluisa 14-iani sisamanngornermi tikissapput, tassanilu Savalimmiuni lagmandi Aksel V. Johannesen ilaatigut ataatsimeeqatigissallugu.

Kommissionimilu siulittaasup lagmandillu isumaqatigiissut EU-p Savalimmiullu suliaqarfiit politikkillu akimorlugit suleqaitiginnerunissaannik qulakkeerisussaq atsiussavaat.

Tallimanngornermi marsip ulluisa 15-ianni Nuummut tikissapput, naalakkersuisullu siulittaasuat, Múte B. Egede ataatsimeeqatigissallugu. Nuummut tikeraarneranni kommissionip Nuummi allaffiata nutaap atoqqaartinneqarnissaa siunertaavoq.

Siunissaq ungasinnerusoq eqqarsaatigalugu suleqatigiinneq

Nuummi allaffik umiarsualiviup eqqaani inissisimavoq, taannalu nunatta EU-llu akornanni sivisuumik suleqatigiinnissaannut nalunaarutiginniffiussalluni.

Tusagassiuutinut nalunaarut naapertorlugu allaffiup EU-p nunatsinninneranik aamma ersarinnerulersitsissaaq.

- Allaffik EU-p Kalaallit Nunaatalu akornanni ikaartarfittut atuutissaaq, aamma naalakkersuisut, namminersortut, inuiaqatigiillu suleqatiginerannut ajornaannerulersitsissalluni. Pimoorussinermik annertusiineq ataatsimut naleqartitatsinnik piffissamullu ungasinnerusumut suleqatigiinnitsinnut ersersitsivoq, Europakommissioni allappoq.

Nunarput EU-mit – taamani EF-imik taaguuteqartumit 1985-imi anivoq, danskilli kunngrqarfiata ilaatut EU-mi Nunat Namminersortitallu Imarpiup Akianiittutut (OLT) ilaalluni.

Nunarput 2021-p 2027-llu akornanni EU-mit 225 mio. EUR-mik – OLT-imiittuni innuttaasoqassuseq eqqarsaatigalugu annerpaamik pissarsiaqartussaavoq.