Meriartoqarnera eqqartuussivimmi suliamut unitsitsisoq
Nakuuserneq pinngitsaaliillunilu atoqatigiinninneq pillugit suliaq pillugu Sisimiuni Qeqqata Eqqartuussisoqarfiani eqqartuussinerup ulluata aappaani suliaqarluartoqaleruttortoq suliaq erngertumik unitsinneqarpoq.
Eqqartuussisooqataasunit pingasunit ataaseq eqqartuussinerup nalaani merialersimanera tamatumani pissutaavoq. Taamaammat suliaq kinguartinnearpoq, aatsaallu aggustimi nanginneqaqqissinaassasoq, unnerluussisussaatitaasoq paasissutissiivoq.
Eqqartuussivimmi suliami angutit pingasut Sisimiuni siorna qaammatit arfinillit pingerlanerani nakuusernerit arlallit pillugit unnerluutigineqarput.
Kalaallit Nunaanni Politiinit unnerluussisussaatitaasup, Signe Suhrip angutinit pingasunit marluk suliap aallarteqqinneqarnissaata tungaanut tigummigallarneqassasut ilanngullugu oqaatigaa.
Piumasaqaammik allannguineq
Unnerluutigineqartut pingajuat nukappiaraq 17-inik ukiulik suliami pissutsinit 15-init ‘ataasiinnarmi’ unnerluutigineqarpoq.
Taanna pineqaatissinneqarnikuunngilaq, taamaammat unnerluussisussaatitaasut angut pineqatissinneqassappat qaammatini sisamani pineqaatissinneqarsimasunut inissiisarfimmiittussanngortitsinissamik piumasaqaatertik kommunimit ukiumi ataatsimi nakkutigineqartussanngortinniarpaat.
Unnerluutigineqartut allat marluk angutit 19-inik 20-nillu ukioqarput. 19-inik ukiulik ukiumi ataatsimi qaammatinilu qulingiluani 20-nillu ukiulik ukiup aappaa avillugu pineqaatissinneqarsimasunut inissiisarfimmiittussanngortinniarneqarput.
