Iliveqarfiup immikkoortortaa kalaallinut attuumassuteqartunut iliveqarfik nutarterneqangaatsiarpoq
Københavnimi iliveqarfimmi Vestre Kirkegårdimi kalaallinut illiveqarfik ujaqqanik qaqortunik ungaluusiorneqarpoq. Ujaqqat qaqortut Kangerlussuarmi qaqqami Qaqortuarsuarmeersuupput, taakkualu Københavnemut assartorneqartut, iliveqarfiup nutarsarneqarnerani ilusilersueqataasoq nunaminertamik ilusilersuisartoq Lone Van Deurs KNR-imut oqaluttuarpoq.
Iliveqarfimmut isaariaq, nunatsinni iliveqarfinni aamma takussaasuusartutut ittumik, qisummik qaavatigut sanningasulimmik aamma napparneqarpoq. Taanna iliveqarfitoqqap nutaajunerusullu akornaniippoq.
Kalaallit Nuaanni biskopeqarfik tusagassiuutinut nalunaarummi taama allappoq,
Iliveqarfiup nutarsarneqangaatsiarneqarnerata naammassineqarnera maajip ulluisa pingajuanni malunnartinneqassaaq, oqaluffimmi Helligåndskirkenimi naalagiarnermik aallartinneqassalluni.
Iliveqarfimmi malunnartitsinermi domprovst Maanngauq Dalager aamma Københavnimi kalaallit ilagiit najuutissapput, tassanilu soqutiginnillutik takkuttunut kaffillertoqassaaq.
Suliniut arlalinnit tapersersorneqartoq
Iliveqarfik nutarsarneqarsinnaalerpoq, Kalaallit Nunaanni biskopeqarfik Danmarkimilu ilagiinnut ministereqarfiup suleqatigiinnerisigut.
Nutarterneqarnissaannut aningaasat danskit aningaasaqarnikkut inatsisaannit kiisalu aningaasaateqarfimmit A.P. Møller Fondemit aningaasaliinikkut, taamatullu aatsitarssarsiorfiup Lumina aamma Royal Arctic Linep aningaasaliinerisigut.
