Angutit pingasut pissutsit 15-it pillugit ataatsimut eqqartuussaassasut
Unnerluussummi angerlarsimaffimmik eqqissiviilliortitsineq, aserorterineq, nakuuserneq, sioorasaarineq aamma pinngitsaaliilluni atoqatiginninneq ilaapput, taakkulu pillugit Qeqqata Eqqartuussisoqarfiani Sisimiuni sapaatip akunnerata tulliani ulluni tallimani eqqartuussisoqassaaq.
Pissutsit 15-it siorna juulip naanerani ukioq manna januaarip tungaanut qaammatini arfinilinni iliuuserineqarsimasuupput.
Unnerluussutip misissornerani angutinit ataaseq pissutsini arfineq-pingasuni unnerluutigineqartoq ataaserlu pissutsini arfineq-marlunni kingullerlu pissutsini ataasiinnarmi nakuusernermut tunngasumi unnerluutigineqartoq atuarneqarsinnaavoq.
Pissutsit amerlanerit angutit ataasiakkaarlutik iliuuserisimavaat, pissutsinili sisamani unnerluutigineqartut marluupput. Ilaatigut pissutsit pingasut nakuusernermut tunngasut kiisalu ‘pisortat oqartussaatitaannik nikassaaneq aammalu ajuallannartumik oqaaseqarneq’ pillugu pissutsimi politiit ikiortaanut homomik homoovutimmillu taaguisimanermut tunngasoq.
Imerniartarfinni nakuuserneq
Nakuusernermut pissutsit ilaat 2023-mi juulliaqqamut aqaguttoq pivoq, angutinit marluk inuk alla kiinaatigut isimmillugu tilluarpaat, pinerlineqartoq taamaalilluni allerumigut illuttut nuttanneqalersinneqarluni.
Angut ataaseq taamani 19-inik ukioqartoq politiinit tamatuma kingorna sapaatini akunnerni marlunni ujaarineqareerluni aatsaat nassaarineqarpoq. Politiit angut taamani ‘navianarsinnaasutut’ nassuiaatigaat.
Imerniartarfimmi pisoq sioqqullugu angut nakuusernermut aamma nakuusernermut sioorasaarinermullu tunngatillugu pissutsini allani aamma pasineqareerpoq.
19-inik ukiulik allanit ataaseq peqatigalugu pinerlineqartoq savimmik sioorasaarlugulu toqqusasseqqasimagaat, unnerluussissummi allassimavoq.
‘Akikissuaq’
Angut taamani 19-inik ukiulik peqatigalugu savimmik siorasaarisimasoq nakuusernermut atatillugu unnerluutigineqarnermi saniatigut pinngitsaaliilluni atoqatiginnissimasutut kingornalu ilisimannittumik sioorasaarisimasutut aamma unnerluutigineqarpoq.
Pinngitsaaliilluni atoqatiginninneq 2023-mi oktobarimi ataasinngornermi unnukkut pivoq, angutip arnaq atoqatigiinnermik unitsitsiniarluni ‘tassa’-mik aamma ‘nuannarinngilara’-mik oqaaseqarsimasoq toqqusasseqqasimavaa.
Angut tamatuma kingorna arnamut arnallu aappaanut sioorasaaruteqarsimasoq unnerluussissummi allassimavoq. Angutip aappariit politiinut eqqartuussivimmullu nassuiaateqarnerannut atatillugu nakuusernissamik sioorasaarsimavai.
Unnerluussissut naapertorlugu angut messenger oqarasuaallu aqqutigalugit arnamut allassimavoq: ‘Atornerlussimagikkit aaaatttt?' aamma ‘Akikissuaq’ aamma ‘Akiniaralagit utsussuaq sallutunerpaaq ilumoorpunga peqqissimissaatit’.
Unnerluussut naapertorlugu arnap aappaanut sioorasaarinermi oqarsimavoq: ‘(arnap aqqa aaqq.) unatassavassi toqullusilu’.
Misiliummik aniguineqaqqasoq
Angut unnerluussissut naapertorlugu pinngitsaaliilluni atoqatiginninnermi ilisimannittumullu sioorasaaruteqarsimasutut unnerluutigineqartoq ukiumi ataatsimi qaammatinilu qulingiluani pineqaatissinneqarsimasunut inissiisarfimmiittussanngortinneqarnissaa piumasarineqarpoq.
Angut imerniartarfimmi nakuusersimasutut ilaatigut unnerluutigineqartoq nakuuserneq alla pillugu Qeqqata Eqqartuussisoqarfiani 2023-mi juulimi eqqartuunneqarsimavoq, taannalu imerniartarfimmi pisoqarnissaanut ullualuit sioqqullugit misiliummik aniguisinneqarsimalluni.
Taamaammat angut ukiumi ataatsimi qaammatinilu arfinilinni pineqaatissinneqarsimasunut inissiisarfimmiittussanngortinneqarnissaa unnerluussisussaatitaasup piumasaraa, angullu kingulleq imerniartarfimmi pisumi ‘taamaallaat’ unnerluutigineqartoq qaammatinik sisamanik pineqaatissinneqarnissaa piumasaqaatigineqarpoq.
Tamatuma sanaitigut suliami pissutsini arlalinni taarsiissuteqartoqarnissaanik piumasaqaateqartoqarniarpoq. Ilaatigut matup aserorneqarsimasup taarserneranut aamma pinngitsaaliinermut atatillugu mitagaanermut kingornatigullu ilisimannittumut sioorasaaruteqarnermut atatillugu taarsiissuteqartoqassasoq.
