Meeqqat oqaaseqartartuat Aviâja Egede Lynge ukiut qulit kingorna tunuartoq
Aviâja Egede Lyngep meeqqat inuusuttullu pisinnaatitaaffii ukiut qulikkuutaani sorsuutiginikuuai. Taakkununnga siutitut tusarnaartuuvoq, qanertullu oqaaseqartartuulluni.
Meeqqat oqaaseqartartuattut illoqarfinniit nunaqarfinnut angalatittarnikuuaa, nunatsinnilu meeqqat inuusuttullu naapinnikuullugit.
Taamaammat ukiut qulingajalluinnaat qaangiuttut oqaasertalernissai Aviâja Egede Lyngemut ajornakusoorpoq.
- Misigisarpassuullutillu suliarpassuupput. Niaqqunni tamarmik kaaviiaarput, ukiut qulit oqaasertaleruminaatsorujussuupput, taanna oqarpoq.
Ukiut qulikkuutaani sulineq
Kingumut qiviaraanni Aviâja Egede Lyngep atorfinikkami suliffigeqqaagaani, soraarneranut atatillugu tallimanngormat inuulluaqqusisoqarpoq – tassa Katuami.
- Meeqqat ulluanni suleqqaarnikuuvunga, ulloq taanna assini tigullugu oqarpoq.
Taamanimiillu pisoqarnikooqaaq. Inuttaa aperigaanni, Nunatta meeqqat pisinnaatitaaffiinut sullissivia MIO ullumikkut taamanikkutut inngilaq.
- Aallarteqqaaratta sakkortoorujussuarmik qisuariartoqartarneraninngaanniit, MIO-millu apeqqusiisoqartarneraninngaanniit uunga killinnikuuvugut, maannakkut MIO apeqquserneqarsinnaanngilaq, avaqqunneqarsinnaanngilaq politikkikkut inuiaqatigiinnut.
Naak MIO-p oqaaseqartartua ukiut ingerlanerini sunniuteqarluaraluartoq, Aviâja Egede Lyngep angunikuusaasa ilaat annerpaaq allaavoq.
- Kisianni tassa taanna inuiaqatigiinni inuit namminneerlutik qaqitsisalernerat taanna isumaqarpunga - taanna uummatinnut ilivara, taannaavorlu aamma angorusinnaikuusama pingaarnerpaat ilaat taanna oqarpoq.
Naggataarneq naleqquttoq
Aviâja Egede Lyngep Meeqqat oqaaseqartartuattut atorfeqarnerata uninnissaanut ullut amerlajunnaarput, suliassarlu kingullerpaaq naammassisimalerpoq. Taamalilluni suliaq naammassivoq.
- Meeqqat oqaaseqartartuattut suliamma kingulliat, tassami suliaq kingullerpaaq, nalunaarusiami uaniippoq - tassa siunissami MIO nutarsarlugu allanngorsarlugu, meeqqat maalaarsinnaalernissaat anguniarlugu immersugaq, taanna oqarpoq.
Naalagaaffiit Peqatigiit Meeqqanut Isumaqatigiissutaat naapertorlugu meeqqat pisinnaatitaaffitik atorlugit ikiorneqarsinnaanngorlugit, kalaallit atugaannut tulluarsagaasoq, nalunaarusiami meeqqat maalaartarfissaat pillugu immikkut allaaserineqarpoq.
Aviâja Egede Lynge maajip 31-ani atorfimminiit tunuassaaq.
- Ukiup kingulliup ingerlanerani nuannaarpunga, qamuuna oqillungalu eqqissisimavunga, taanna oqarpoq.
