Politikki

Meeqqat navianartorsiortut pillugit danskit ikiuunnissaat Aajap kissaatigaa

Danmarkip Nunatta isumaginninnermut tunngasunut akisussaanera ataqqigaluaraa marluullutik meeqqat inuusuttullu Nunatsinni atugarisaasa pitsanngorsarnissaannut iliuuseqarnerusinnaapput. Folketingemi ilaasortaq Aaja Chemnitz Larsen taama isumaqarpoq.

Allattoq Nutaarsiassaqartitsivik / Nyhedsredaktionen

januaarip 23-at 2016 12:52

- Tupaallaatigisassaanngilaq oqaruma, Kalaallit Nunaata akisussaaffigaa, tamannalu aalajangiusimavara, Inuit Ataqatigiit Folketingemut ilaasortaatitaat, Aaja Chemnitz Larsen, Kalaallit Nunaanni meeqqat atugarisaat isumaginninnermilu ajornartorsiutit pillugit Folketingemi oqallittoqarmat taama oqarpoq.

Tamannali isumaqanngilaq Danmark akisussaaffeqanngitsoq, Aaja Chemnitz Larsen isumaqarpoq.

Aamma atuaruk Folketingemi amerlanerussuteqartut Nunatta akisussaaffii ataqqivaat

Aaqqiissutissammi ilagaat Danmarkip akisussaaffimminik, soorlu eqqartuussiveqarnermut tunngasuni kommunefogedit eqqarsaatigalugit, isumaginninnera.

- Kinguaassiutitigut atornerluisoqarpat politiinik kommunefogenilluunniit oqarfigisassaqanngikkunik taava tamanna inuit inatsisitigut isumannaatsuunissaannut sunniuteqarnerlussaaq. Isumaqarpungalu politiit nunaqarfinni sinniisoqarnerat pinaveersaartitsinermut iluaqutaasinnaasoq, Aaja Chemnitz Larsen oqarpoq.

Naalakkersuisuni – ingammik Qaasuitsup Kommuniani meeqqat atugarisaanni isorinninnerup kingorna – qitiusumik allaffimmik, kommunit ilaqutariinnut sullissinerannik ikiuisussanik, pilersitsisoqarpoq.

Aamma atuaruk NIISIP naalakkersuinikkut iliuuseqaqqusivoq

Tamannali naammanngilaq, Aaja Chemnitz Larsen isumaqarpoq. Inuit Ataqatigiit ilaqutariinnut sullissinermi isumaginninnermut siunnersortit amerlanerit sulisorineqarnissaat, isumaginninnermullu siunnersortit ataatsikkut suliassaasa killilerneqarnissaat kissaatigaat.

- Iliuuseqartoqarnerusariaqarpoq. Sulianik assigiinngitsunik 300-nik ataatsikkut suliaqaruit taava iluaqutaanavianngilaq suliami ataatsimi ikiorneqaruit suliallu allat 299-it naammassiniarlugit ingerlaqqikkuit. Meeqqammiuku akisussaaffigineqartartut angajoqqaajusut sumiginnaagaangata, Aaja Chemnitz Larsen Folketingemi Dansk Folkepartiip piumasaqarneranit oqallittoqareersorlu oqarpoq.

Aamma atuaruk Søren Espersen: Isumaginninnermut suliassaqarfik Danmarkip tigugallartariaqarpaa

Folketingemi Siumumit ilaasortaq Aleqa Hammond oqallinnermi peqataanngilaq.