Søren Espersen: Isumaginninnermut suliassaqarfik Danmarkip tigugallartariaqarpaa
Taama isumaqarpoq Meeqqat Illersuisuata nalunaarusiaani "Kalaallit Nunaanni inuusuttut" septembarimi saqqummersinneqartumi naqissuserneqarmat, Avannaani nunaqarfinni illoqarfinnilu arlalinni meeqqat Naalagaaffiit Peqatigiit Meeqqat pillugit isumaqatigiissutaanni aalajangersakkat ataatingaatsiarlugit atugaqarlutik inuusut. Tamatumanilu kaattoqartarnera kinguaassiuutitigullu atornerluisoqartarnera ilaatigut pissutaavoq.
Danmarkip Radioata aallakaatitassiaani "P1 Morgen"-imi ullumikkut marlunngornermi aallakaatinneqartumi Søren Espersenip oqaatigaa Kalaallit Nunaata meerartami inuusuttamilu paarilluarnissaannik suliassaq nammassinnaanngikkaa.
AAMMA ATUARUK Meeqqat Illersuisuat: Meeqqat pisinnaatitaaffii unioqqutinneqarput
Taamaammat Danmark akuliuttariaqarsoraa isumaginninnermullu suliassaqarfik tigugallarlugu, ilaatigullu Danmarkimit isumaginninnermi siunnersortinik perorsaasunillu angalasartunik immikkut ittunik Nunatsinni isorliunerusunut ikiuiartortitsisoqarluni.
Folketingimut ilaasortaq Aaja Chemnitz Larsen aamma isumaqarpoq Nunatsinni oqartussaasut politikerillu meeqqanik inuusuttunillu ikiortariaqartunik sullissinerat annikippallaartoq. Danmarkilli isumaginninnermut suliassaqarfimmik utertitsinissaa isumaqatiginngilaa.
Ilaqutariinnermut, Naligiissitaanermut Isumaginninnermullu Naalakkersuisup Martha Lund Olsenip ajornartorsiuteqarnera Danmarkip Radioanut uppernarsarpaa, Søren Espersenilli siunnersuutaa itigartilluinnarlugu. Taassuma oqaatigaa meeqqat pitsaanerusunik atugaqalernissaannut Qaasuitsup Kommuniani suliniutinik nutaanik aallartisaasoqareersoq.
