Meeqqat misileraatigineqarsimasut naalagaaffimmit taarsiiffigineqartussanngortut
Danskit ministeriunerat, Mette Frederiksen Danmarkimi siunnerlugu pisortatigoortumik siullermeertumik ”meeqqanut misileraataasimasunut” 2020-mi utoqqatsissuteqarpoq.
Utoqqatsissuteqarnerlu maanna malitseqartinneqarluni kalaallinut misileraataasimasunut sinneruttunut tassa suli uumasunut arfinilinnut 250.000 koruunimik taarsiissuteqartoqartussanngorpoq.
Danmarkimi Isumaginninnermut Utoqqarnullu ministereqarfik taama paasissutissiivoq.
AAMMA ATUARUK Kalaallit meeraat taarsiiffigineqarnissaminnut itigartinneqarput – maanna naalagaaffik eqqartuussisunut sassartinniarpaat
Inuit arfinillit Danmarkimut 1951-imi nuutsinneqarnerminni, namminneq ilaqutariittullu inuuneqarsinnaanermut pisinnaatitaaffitsit innarlerneqarsimanerarlugit danskit naalagaaffiannik eqqartuussissutigoortitsinerisa kingunerisaanik taama taarsiissuteqartoqarpoq.
Eqqartuussivimmi suliaq isumaqatigiinnermik inerneqarpoq, naalagaaffillu inunnut taakkununnnga immikkut 250.000 koruuninik taarsiissuteqartussanngorluni.
- Meeqqat nuutsinneqarnerat Kalaallit Nunaata Danmarkillu oqaluttuarisaaneranni taartuuvoq, tamannalu takunngitsuusaarneqassanngilaq. Pisimasut meeqqanut kingunerluuteqangaatsiarput, taakku oqaatsititik, kulturikkut kinaassusertik ilaqutaminnullu atassuteqarnertik annaavaat, isumaginninnermut utoqqarnullu ministeri, Astrid Krag oqarpoq.
- Inuit arfinillit naalagaaffimmit maanna taarsiiffigineqartussanngornerat nuannaarutigaara, ministeri oqarpoq.
Meeqqat 22-t 1951-imi misiliutaasussatut Kalaallit Nunaanniit Danmarkimut nassiunneqarput.
Meeqqat taakkua misileraanermi pingaarnertut inissisimapput, taamani meeqqat qallunaanngorsarneqarput maligassatut Kalaallit Nunaannut utersinnaaqqullugit.
Taakkuali angerlaramik kalaallisut oqalussinnaanngillat ilaquttaminnilu najugaqaqqusaanatik. Meeqqallu taamani Nuummi børnehjemmimi inissinneqarlutik.
Meeqqat 22-t sinneri arfinillit ullumi suli inuupput. Taakkua 80-it missaanni ukioqarput.
Naalagaaffiup taarsiissuteqarnissaq itigartitsissutigigaluaraa
Isumaginninnermut inisterip, Astrid Kragip taarsiissuteqarnissaq siorna maajimi itigartitsissutigaluarpaa.
"Siornatigut kukkussutaasut nassuerutigineqarneri uani qitiupput", taanna siorna oqarpoq.
Isumarli taanna maanna allaavoq,
Kalaallit meeqqat katillugit 22-t ilaquttatik qimallugit danskisut perorsarneqarnissaat pillugu Danmarkimut aallartinneqarnerannut piffissamut taarsiissuteqarneruvoq. Taakku danskisut oqlaulluarsinnaalernissaat nunattalu ineriartorneranut iluaqutaalernissaat siunertaasimavoq.
Meeqqat aallartinneqarnerminni sisamanit qulingiluanut ukioqarput. Taakkunanngalu ilaquttaminnut angerlaqqittoqanngilaq. Tassungali taarsiullugu Kalaallit Nunaanni meeqqat illuanniilerlutillu ilaqutarsianiilersinneqarput.
Taakkunannga amerlasuut misigisaminnik kingunerluuteqarput, arlallillu kingornatigut imminut toqullutik.
Meeqqat aallartinneqarnerat pillugu sukusumiisumik nassuiaat danskit naalakkersuisuisa nunatsinniu Naalakkersuisut suliakkiissutigisaat siorna 2020-mi decembarimi saqqummersinneqarpoq.
