Kalaallit meeraat taarsiiffigineqarnissaminnut itigartinneqarput – maanna naalagaaffik eqqartuussisunut sassartinniarpaat

Kalaallit meeqqat arfinillit perorsaariaatsinik misileraataallutik 1951-imi Danmark-imut nassiunneqartut, taarsiiffigineqarnissaat danskit naalagaaffiata itigartitsissutigaa.

Taakkua eqqartuussissuserisuata, advokat Mads Pramming-ip tamanna DR-imut nalunaarutigaa. Taakkua maanna suliassaq eqqartuussivinnut suliassanngortinniarpaat.

- Piumasaqaatip itigartinneqarneratigut eqqartuussisunullu suliassanngortitseqqulluta nalunaarnerat, tunngaviusumik assigiinnarpaa oqarunik, pisimasut pillugit pisussaatitaanatik suliassarlu eqqartuussivinni suliarineqartariaqarnerarlugu, Mads Pramming DR-imut oqarpoq.

Taassuma taakkua kalaallit arfinillit, suli uumasut, immikkut tamarmik 250.000 koruuninik taarsiiffigineqarnissaannik piumasaqaat novembarimi Statsministeriaqarfimmut nassiuppaa. Taamani kalaallit meeraat 22-t Danmark-imut aallartinneqarput, taakkuali ilaat 16-it toqoreernikuupput.

Inunnik isumaginninnermut ministereqarfik, Socialministeriet, taarsiiffiginninnissamut itigartitsivoq, eqqartuussivimmilu suliassanngortitseqqusilluni oqarluni. Mads Pramming-ip ataasinngornermi Statsministeriaqarfik eqqartuussisunut sassartussanngortinniarlugu taanna DR-imut oqarpoq.

AAMMA ATUARUK Meeraalluni misiliutaasimasoq taarsiivigineqarnissaq pillugu: Kiisami tamarmi naggaserneqarsinnaalerpoq

Statsminister Mette Frederiksen-ip (S) siorna kalaallit 22-t taakkua misileraanermut peqataatinneqartut utoqqatserfigai.

Socialminister Astrid Krag (S) maajimi taarsiinissamut itigartitsivoq. "Siornatigut kukkussutaasut nassuerutigineqarneri uani qitiupput", taanna taamani oqarpoq.

Kalaallit meeraat taamani angajoqqaatik qimallugit qallunaat oqaasiinik ilinniariartortinneqartut, sisamaniit qulingiluat tikillugit ukioqarput.

Taamani Kalaallit Nunaata ineriartorneranut iluaqutaasussamik qallunaatut oqaluttunik siuttuutitassaqarnissaq siunertaavoq.

Tamatuma kingorna meeqqat Nuummi børnehjemmimut inissinneqarput, kalaallisullu oqaloqqusaanatik.

AAMMA ATUARUK Ministeriuneq nunatsinnukarluni meeqqanut misileraataasimasunut utoqqatserusuttoq

Misileraaneq meeqqanut annertoorujussuarmik sunniuteqarpoq. Taakkua affaat inuunerminni atornerluilerput tarnimikkullu ajornartorsiuteqarlutik, amerlasuut sivikitsuinnarmik inuupput, ikittuinnaallu ilinniakkaminnik naammassisaqarlutik.

Kalaallit arfinillit suli ulloq manna inuusut 70-it sinnerlugit ukioqarput.

Ukioq manna siusinnerusukkut børnehjemmimi Godhavn-imi inissinneqarnikut 45-t, 1960-ikkunni paarinerlunneqarlutillu naapertuilluanngitsumik iliuuseqarfigineqartarsimanertik pillugu, 300.000 koruuninik taarsiiffigineqaarput.

Taakkua tamanna anguaat, naalagaaffiup eqqartuusssivimmut suliassanngortinneqarnerata kingorna, tamatumalu kingorna tassani najugaqartuusimasut taarsiiffigineqarnissaannut isumqatigiissuteqarfigineqarput.