Ministeriuneq nunatsinnukarluni meeqqanut misileraataasimasunut utoqqatserusuttoq
Ministeriunerup, Mette Frederiksenip (S) nunatsinnukarluni meeqqanut misileraataasumik 1951-imi Danmarkiliartinneqarsimasunut pisortatigoortumik oqaaseqarnikkut utoqqatseriartornissaa ilimanarluinnarpoq. Meeqqanit 22-nit arfinillit ullumikkut suli uumapput.
Meeqqat ineriartortitsinermik misileraanerup ilaatut 1951-imi Danmarkiliartinneqarput, meeqqat danskiunerulernissaat nunatsinnullu uterunik maligassiusunngornissaat siunertaavoq. Meeqqanit taakkunannga arfiniliinnaat ullumikkut uumapput.
Folketingimi ilaasortap, Siumumeersup, Aki Matilda Høegh-Damip oqaatsitigut utoqqatsertoqarnissaanut pilersaaruteqartoqarnersoq apeqqutigaa. Mette Frederiksenillu pilersaaruteqartoqartoq tassani akissutigaa.
Meeqqat misileraatigineqartut
Meeqqat 22-t misileraataasumit nunatsinnit Danmarkimut 1951-imi aallartinneqarput.
Taakku ineriartortitsiniarnermut misileraanermi qitiusimapput, meeqqat danskiunerulernissaat nunatsinnullu uterunik maligassiusunngornissaat anguniagaasimavoq.
Meeqqalli angerlaramik oqaatsitik puiorsimavaat ilaquttaminnilu najugaqarsinnaatinneqaratik Nuummi meeqqat angerlarsimaffiannut inissinneqarput.
Meeqqanit taakkunannga 22-nit arfinillit suli uumapput. Taakkulu 80-it missaannik ukioqarlutik.
- Aap. Meeqqanut misileraataasimasunut, taamani aalajangiinernik kingunerluuteqarfiungaatsiarnermik nalaataqartunut utoqqatsernerup ornigulluni erseqqissaatigineqarnissaa pissusissamisoornerata illugiinnik soqutigineqarnera tusaavara, Mette Frederiksen oqarpoq.
Naalakkersuisut siulittaasuat aaqqissuussinissaq pillugu oqaloqatigigaa
Taanna Danmarkimi ministeriunertut pisortatigoortumik siorna utoqqatsissuteqarpoq, utoqqatsernerli allakkatigut pivoq. Tamanna meeqqat 22-t pillugit Naalakkersuisut suleqatigineratigut qulajaasoqarnerata saqqummiunneqarneranut atatillugu pivoq.
- Pereersimasut allanngortissinnaanngilavut. Kisianni paarisussaasimagaluakkatsinnut sumiginnarsimasatsinnullu tunngatillugu akisussaaffimmik tigusisinnaavugut utoqqatserfigalugillu, Ministeriuneq tusagassiuutinut nalunaarummi taamani allappoq.
AAMMA ATUARUK Meeqqat misileraatigineqarsimasut: Mette Frederiksen pisortatigoortumik allaffigalugit utoqqatsertoq
Mette Frederiksenili nunatsinnukarluni Danmark sinnerlugu aamma utoqqatsissuteqarusuppoq.
- Taamaammat qaqugu ornigullunga aaqqissuussisoqarsinnaanissaa pillugu aamma Kalaallit Nunaanni aaqqissuussinissaq pitsaanerusorisara pillugu, Naalakkersuisut siulittaasuat aamma attaveqarfigaara, Ministeriuneq Aki Mathilda Høegh-Damimut akissuteqarpoq.
Utoqqatsernissamut piffissaliisoqanngitsoq
Utoqqatsertoqarnissaanilli aaqqissuussisoqarnissaa qaqugu pissanersoq pillugu annerusumik paasissutissiissutigineqanngilaq.
KNR-ip Naalakkersuisut siulittaasuata Naalakkersuisoqarfia pilersaarutit pillugu attaveqarfigaa.
Tassani naalakkersuisoqarfiup tusagassiinermik suliaqartua, Uiloq Mathæussen ministeriunermut innersuussivoq.
Ministeriunerup KNR-ip saaffiginnissutaa suli akissuteqarfiginngilaa.
Aki-Mathilda Høegh-Damip ministeriuneq meeqqanut misileraataasimasunut sinneruttunut utoqqatsissuteqarniarnersoq aperivoq. Assi: Scanpix
