Meeqqat misileraatigineqarsimasut: Mette Frederiksen pisortatigoortumik allaffigalugit utoqqatsertoq
Allakkat taakkua ilaatigut ima imaqarput:
- Allakkat uku oqaaserlu ataaseq inuunerit tamaat ujariatsinerujussuannut taarsiiutaasinnaanngitsut ilisimavara. Utoqqatsissuterpullu inuuninni ingerlariaqqinnissannut iluaqutigissanerlugu illerpiaq soorunami nammineq aalajangigassaraat.
Inuuninni ilungersuutigisimasatit tamaasa pillugit eqqarsaatikkut qamanngavik najorlutillu ataqqillutit akunnattuunngivillunga ima oqarlanga:
Utoqqatserpunga!
Utoqqatserneq Danmarkip naalagaaffiata meeqqat kalaallit 22-t ilaqutaminnit avissaartitaallutik 1951-imi Danmarkiliartitaanerannut tunngavoq.
Meeqqat taakkua danskit oqaasiinik kulturiannillu ilinniarteriarlugit nunatsinni kingulliarsunnut maligassiuisuujartortillugit angerlarnissaat siunertaasimavoq.
Naluneqanngitsutulli taama pisoqanngilaq.
Mette Frederiksen ilunngusoq
Meeqqammi taakkua 22-t ilarpassui nalaassimasamik kingunerlutsitsipput, imigassamik ikiaroornartumillu atornerluisunngorput ilaallumi imminoriarsimallutik.
Taakkualu taakkunanngalu suli inuusut oqaluttuassartaat ukiorpassuarni ilunnguutigisimagini, danskit ministeriunerat tusagassiuutinut nalunaarpoq.
AAMMA ATUARUK Helene utoqqatsernissamut kinguartitsineq pillugu: Assut ajuallappunga
Mette Frederiksenip taakkunannga suli inuusunut pisortatigoortumik allagai ilaatigut ima imaqarput:
- Taama kingunerluutigitigisannik misileraanermi ilaasimanerit ilunnguutigisorujussuuara. Misileraaneq ilaaffigisimasat ajunnginnerpaamik siunertaqarfiusimagunaraluartoq, isumaqarpunga eqqunngitsumik naakkittaatsumillu pineqarsimasutit.
Oqaluttuarisaanermik qulaajaaneq atuarneqarsinnaanngortoq
Utoqqatserneq Naalakkersuisut danskillu naalakkersuisui oqaluttuarisaanermik qulaajaaqatigiinnerannik tunngaveqarpoq. Oqaluttuarisaanermik qulaajaaneq naammassivoq, taannalu uani atuarsinnaavat.
Naalakkersuisut siulittaasuat, Kim Kielsen, utoqqatserneq pillugu ima oqarpoq:
- Meeqqat 22-t nalaassimasaat pillugit saqqummiussaq killitsinnareqaara. Immikkut ittumik alliartornerat ilaqutaannut, inuiaqatigiinnut minnerunngitsumillu kalaaliussusaannut atatillugu kingunerluuteqangaatsiarpoq.
