Helene utoqqatsernissamut kinguartitsineq pillugu: Assut ajuallappunga
- Paasitinneqaqqaarama assut ajuallappunga.
Helene Thiesen Danmarkimi meeqqat misilittaatigineqarsimasut utoqqatserfiginissaat kinguarteqqinneqartoq pillugu taama oqarpoq.
Helene kalaallinut meeqqanut misiligutaallutik Danmarkimut 1951-imi aallartinneqartunut ilaavoq.
AAMMA ATUARUK Meeqqat misilittaatigineqarsimasut utoqqatserfiginissaat kinguarteqqinneqarpoq
Taanna coronavirus pissutaalluni utoqqatsernissaq kinguartinneqarsimasoq oqarasuaatikkut ilisimatinneqarpoq.
- Paasitinneqaqqaarama assut ajuallappunga, eqqarsarlunga taavami pissanerpoq, qanormitaava pissava, immaqa unitsiinnarpaat, Helene Thiesen oqarpoq.
Aatsaat kinguartinngilaq
Utoqqatsernissaq aatsaat kinguartinneqalinngilaq. Pisimasup eqqaamaneqartuartussap qulaajarneqarnera ukioq manna juunip aallaqqaataani naammassisimasussaagaluarpoq.
- Tamatigut kinguartitsisoqaraangat eqqarsarnarpoq: Utoqqatsernissaat uppernarnerpoq? Ajuallannartarpoq, soorlu nakkaqqilaartarluta soorlu: aah, immaqa pinavianngilaq.
Qulaajaaneq siusinnerpaamik novembarimi naammassisinnaasoq, Inunnik Isumaginninnermut Nunamullu Namminermut ministereqarfik nalunaarpoq.
AAMMA ATUARUK - En undskyldning vil betyde alt!
Helene ajuallakkaluarluni suli neriuuteqarpoq.
- Upperaara takkukkumaartoq, utoqqatserumaarput.
Mette Frederiksenip Bornholmimi siorna juunip 14-ianni oqalugiarnermini ministeriuninngussangaluaruni kalaallit meeqqat misilittaatigineqarsimasut 22-t utoqqatserfigiumaarlugit neriorsuivoq.
Qulaajaaneq naammassineqareerpat aatsaat meeqqat misilittaatigineqarsimasut pisortatigut utoqqatserfigineqarnissaat Naalakkersuisut kiissatiginikuuaat.