Naalakkersuisut: Meeqqat kigutaannik narlorsaasarneq unitsinneqanngilaq

Sermitsiaq.ag-p sapaatit akunnerata siuliani allaaserisaa naapertorlugu, peqqinnissaqarfiup qullersaqarfiata pisortat kigutileriffiini, meeqqat kigutaat narlorsaaserlugit suliarineqartarnerat unitsippaa.

Tamannali eqqortuunngitsoq Peqqissutsimmut naalakkersuisoqarfik ataasinngornermi allappoq.

- Naalakkersuisulli aalajangigassaq tamanna akuersissutigisassatut suliarinikuunngilaat, soorlu tamannarpiaq tunngavigalugu Naalakkersuisut aalajangigaq tamanna akuerinikuunngikkaat, Naalakkersuisoqarfik allappoq.

- Meeqqanut neqerooruteqarnermik unitsitsineq aalajangigassaq annertuujuvoq, politikkikkut oqallinnerit aamma paasissutissiissutaasumik tunngaveqarluni aalajangiinerit piumasaqaataasut sioqqullugit atuutilersinnaanngitsoq, Peqqissutsimut naalakkersuisoq Martha Abelsen oqarpoq kigutigissaanerlu pillugu nalunaarut nr. 15, septembarip 13-ani 2006-imeersoq innersuussutigalugu.

Sulisussarsiniartarnerli ajornakusoormat kigutit narlorsarneqartarnissaannut misissuisarneq allanngortinneqartoq Peqqissutsimut naalakkersuisoqarfiup erseqqissarpaa.

Peqqissutsimut naalakkersuisoq Martha Abelsen aggustip ingerlanerani misissuititsiniarpoq. Taakkualu inernerinik Inatsisartut Ilaqutariinnut Peqqissutsimullu Ataatsimiititaliaannut saqqummiussissalluni. Taava misissuinerup inerneri aallavigalugit neqeroorutit ingerlaannarnissaanut politikkikkut aalajangiisoqarsinnaassasoq, naalakkersuioqarfik allappoq.

Inatsisartut oktoberimi Peqqinnissaqarfiup siunissami neqeroorutissai takorluukkallu pillugit isumasioqatigiinnissamut qaaqqusaapput, tassanilu Peqqinnissaqarfik meeqqat kigutaannik narlorsaanissamut suli neqerooruteqaannassanersoq oqallisigineqassasoq naalakkersuisoqarfik aamma paasissutissiivoq.