Meeqqat isumasiorneqarlutik ataatsimeersuarneranni silap pissusiata allanngornera ukkatarineqarpoq: "Meeqqat siunissaapput"
Sapaatiummat ataasinngormallu Ilulissani meeqqat inuusuttuaqqallu 21-t isumasiorneqarlutik ataatsimeersuarput.
Ukioq manna silap pissusiata allanngornera aamma atajuartitsinnaasumik atuineq meeqqanut inuusuttuaqqanulliu ilinniartitsissutigineqarput.
Ukiut tamaasa Kalaallit Nunaanni meeqqat isumasiorlugit ataatsimeersuarnerit peqatigiiffimmit Nakuusamit ingerlanneqartarput, taannalu suleqatigiiffiuvoq UNICEF Danmark-ip aamma Kalaallit Nunaanni Namminersorlutik Oqartussat akornanni. 2011-miilli taanna pisalerpoq.
Nakuusami suliamik ingerlatsisoq Aviaaja Pregaard isumaqarpoq meeqqat inuusuttuaqqallu silap pissusiata allanngorneranut isummernissaat pingaartuusoq, tamannami aamma nunarsuarmi tamarmi sammineqarpoq.
Assi: Nakuusa
- Silap pissusiata allanngorneri pingaartuupput, tassami meeqqat siunissaammata. Taakkuuna silarsuaat massakkorpiaq inuuffigigipput. Uagut inersimasutut maaniikkunnaarutta taakku maani inuusussaapput. Taamaattumik pingaaruteqaqaaq oqallinnermut uagutsinnit ilaatinneqarnissaat, Aviaaja Pregaard oqarpoq.
AAMMA ATUARUK Meeqqat illersuisuat: Naalakkersuisut inuusuttunik imminut toqunnermik nalaataqarsimasut tusarniaanngillat
Ilutigalugu isumaqarpoq meeqqat inuusuttuaqqalu amerlasuut pinngortitarput silallu pissusiata allanngornera eqqarsaatigisaraat.
- Tamannami pingaartuuvoq ulluinnarni nuunerat silap pissusiata allanngorneranik aamma sunnerneqarmat. Assersuutigalugu Qaanaami angajoqqaavi pisarnermissut massakkut aningaasaqannginnerunerat illuisalu taama isikkoqarnerat peqquteqarsinnaavoq silap pissusiata allanngorneranik, taamalu nunap qeriuaannartup akkiartulerneranik, Aviaaja Pregaard oqarpoq.
Politikerinut innersuussutit
Simigaq Olsvig Ilulissaneersoq meeqqat inuusuttuaqqallu ataatsimeersuarneranni peqataavoq. Meeqqat ataatsimeersuarnerata kingunerisaanik ikinngutitaartorsimavoq ilisimasaqarnerulersimallunilu.
- Oqaluuserisat artornarsimapput, kisianni silap pissusiata allanngornera pillugu annertunerusumik paasisaqarpunga, ilaatigut soorlu sooq taama kiatsigilersimanersoq, Simigaq Olsvig oqaluttuarpoq.
Meeqqat ataatsimeersuarnerat aalajangiinermik inerneqarpoq, tassanilu meeqqat aalajangiisartunut, politikerinut aamma sumiiffinni inuiaqatigiinnut innersuussuteqarput silap pissusiata allanngormera pillugu paasisaminnik tunngaveqartunik.
Assi: Nakuusa
Angutitsiak Rafaelsen Aasianneersoq meeqqat ataatsimeersuarnerannut aaamma peqatasoq oqaluttuarpoq innersuussut ataaseq immmikkut ingerlateqqikkusullugu.
- Sumiiffinni inuiaqatigiinnut innersuussutigaarput atortussat sumiiffinneersut annertunerusumik atorneqartariaqartut, oqarpoq.
Meeqqat ippassaq innersuussutitik Meeqqanut, inuusuttunut ilaqutariinnullu Naalakkersuisumut Paneeraq Olsenimut Naleqqameersumut tunniuttussaagalauarpaat.
Kisianni Nalaakkersuisuni naalakkersuisooqatigiit allanngornerat pissutigalugu innersuussutit taarsiullugu nunami borgmesterinut aamma Meeqqanut, inuusuttunut ilaqutariinnullu Naalakkersuisussamut tunniunneqarumaarput.