Meeqqat inuusuttullu nunanit tamalaaneersut qitinnikkut inerisassasut

Meeqqat inuusuttullu qitittartoqatigiit nunatsinneersut, Norgemeersut, Danmarkimeersut Nigeriameersullu qitinnikkut suleqatigiillutik inerisassapput.

Nunat sisamat taakkua imminnut ungasikkaluarlutik qitinnikkut ataqatigeeqisut, Nunatta Qiteqatigiittarfiata NuQi-p suliniutini aqutsisoq Ruth Montgomery-Andersen oqarpoq:

- Kalaallit Nunaat inuttunngilaq, taamaammat nunani allani qitittartoqatigiinnik isumassarsivigeqatigisinnaasatsinnik ujartuivugut. Taamaalillutalu pikkorissunik suleqatissarsivugut, taanna oqarpoq nangillunilu:

- Tassa qitittartoqatigiinnik pingasunik nunanit tamalaaneersunik paarlaateqatigisinnaasatsinnik suleqatissarsivugut.

Suliniutertillu taanna isumalluarfigigaluaqigitsik qiterisaa tassaasoq qitik, Ruth Montgomery-Andersen oqarpoq:

- Suliniutitta qiterisaa tassaavoq qitik. Aamma inuusuttut qitinnermik isumassarsivigeqatigiisinnerisigut inerisarfeqaqarnissaat.

Suleqatigiinneq inuiaqatigiinnut nukittorsaataassasoq

Qitinnermik suliniut aningaasaateqarfik Nordisk Kulturfondimit tapiiffigineqarpoq. Suliniut nutaajuvoq, taamaammat suliniummi tassani sorpiaat suleqatigiissutaaniarnersut suli nalunarpoq.

Qiterisaali tassaavoq suleqatigiinnissaq. Aamma paarlaateqatigiinnissaq isumassarsiveqatigiinnissarlu, Ruth Montgomery-Andersen oqarpoq:

- Milittakkatsinnik paarlaateqatigiiffiussaaq, taanna oqarpoq nangillunilu:

- Qanorsuaq iliorsinnaavugut. Nammineq iliuuseqarsinnaavugut. Sapinngilagut paarlaateqateqarsinnaavugut. Tassa suleqatigiinnitta siunertaa tassaavoq avitseqatigiinnissaq.

Taamaaliornertillu sunniuteqalluassaqisoq, Ruth Montgomery-Andersenip upperalugulu neriuutigaa. Inuusuttunut qitittartoqatigiinnuinnaanngitsoq, aammali allanut:

- Sunniuteqangaatsiartussaassaaq. Suliniuterput inuusuttunik kalaallit oqaasii atorlugit siulersorneqartunik Kalaallit Nunaanni qitittartoqatigeeqaannarnissaanut iluaqutaassasoq neriuutigaarput, taanna oqarpoq. 

Inuiaqatigiit ikorfartueqataanissaat pisariaqartoq

Taamaammat suliniutertik suleqatigiiginnarnissamik Kalaallit Nunaannilu inuiaqatigiit allannguinissaannut iluaqutaassasoq, Ruth Montgomery-Andersenip aamma neriuutigaa.

Inuiaqatigiilli aamma tunniussaqarnissaat pisariaqartoq, Ruth Montgomery-Andersen erseqqissaavoq:

- Qitinneq nuannarilluinnarpara. Kalaallit meeqqat inuusuttullu peqatigissallugit ineriartortullu takusinnaallugit nuannarisorujussuuara. Taamaammat isumaqarpunga qitittartuutitta ineriartorfeqarsinnaannik inuiaqatigiittut qularnaareqataanissarput akisussaaffigaarput.