Erinarsortartoq atuakkami UNESCO-meersumi ilaasoq: Qilaatersorneq inuiattut katerissutissaqqippoq

Qilaatersorneq nunap inoqqaavisa kulturikkut kingornussaat pillugit atuakkami Naalagaaffiit Peqatigiit kattuffiat UNESCO-meersumi immikkoortunut ilaavoq.

Erinarsortartoq eqqummiitsuliortutut Varna GL-imik atequsilik, Varna Marianne Nielsen, qilaatersornermik ilisimasaminik atuakkami “Celebrating the living heritage of indigenous peoples”-imi (nunap inoqqaavisa kulturikkut kingornussaannik nersorinninneq, aaqq.)) ilanngussaqarpoq. Qilaatersortartut allat marluk aamma nunatsinneersuusut, tassa Nuka Alice Lund aamma Leif Saandvig Immanuelsen, atuakkami tassani aamma ilaapput.

- Qilaatersorneq inuuninni isumaqarnerpaavoq, kinaassutsinniilernikuummat. Taavalu aamma uannut atugaralugu, kisianni annissinermut atortarakku aamma, Varna Marianne Nielsen oqarpoq.

Varna Marianne Nielsen atuakkap ilaaffigisani UNESCO-p Parisimi qullersaqarfiani saqqummersinneqarnerani peqataareerluni Nuummut ilaquttanilu uteqqammerpoq.

Ilaquttaminut ingerlateqqinniaraa

Qilaatersorneq Varna Marianne Nielsenip ilaqutaani Tunumeersuni isumalerujussuusimavoq, 1940-kkulli kingornali aallukkunnaariartorsimallugu.

Nunatsinnimi politikkikkut qallunaanngorsaaneq taamani ukkatarineqarpoq.

Varna Marianne Nielsen meeraalluni ilaqutaani tivasoqartarpoq, ilaqutaatali qilaatersornermik ingerlatitseqqiivigisimanagu.

- Peroriartorninni maqaasisutut illunga malersugaqartarpunga, malersugarali suunersoq nalusarlugu, taanna oqarpoq.

- Qilaatersortumik meeraallunga takoqqaaramali alutorilerpara, aatsaalli inersimalerama nammineq toqqaasinnaanngorama ilaquttannullu ingerlateqqikkusukkakku aallutilerpara, erinarsortartoq oqarpoq.

Qilaatersorneq Varna Marianne Nielsenip eqqartuussisutut atorfimmut atatillugu 2009-mi Tasiilamiinnermini aallutilerpaa.

Qilaatersornerlu kinaassusaaniilernikuummat maanna ulluinnarsiutigaa.

Atugaanngitsunik periarfissarpassuaqartoq

Qilaatersornerup ullutsinni kulturitsinnut maannaminngarnit ilaanerulernissaa, Varna Marianne Nielsenip pingaartippaa. Taamaammat atuagaq ilaaffigisani UNESCO-meersuusoq “Celbrating the living heritage of indigenous peoples” kalaallisuunngortinneqarumaartoq, taassuma neriuutigaa.

Qilaatersornerup ullutsinni kulturitsinnut maannaminngarnit ilaanerulernissaa, attanneqarnissaa ineriartortinneqarnissaalu siunertaralugit Qilaat.org inngernermut tivanermullu nittartakkakkut ilimasassarsiorfissatut pilersippaa.

- Kinaassutsitsinniimmammi kulturitsinnut ilaaginnarnissaa pingaarpoq. Timi oqaatsillu atorlugit annissinissamut attaveqatigiinnissamullu, aamma ullutsinni, atugassaqqippoq, taanna oqarpoq.

- Inuiaat allarpassuit kulturiinut naleqqussarluta inuusaaseqarnerput eqqaagaanni qilaatersorneq, tivaneq inngernerlu periarfissarpassuaqarput suli maannakkut ullutsinni atugaanngitsunik, Varna Marianne Nielsen aamma oqarpoq.

Qilaatersorneq aamma assersuutigalugu ajorunnaarsaatissaqqissuusoq, taanna oqarpoq.

Taamaammat qilaatersorneq kulturikkut kingornussatsinnut ilaammammi nunatsinni kikkunnilluunniit ilisimaarineqaqqullugu meeqqat atuarfiini atuartitsissutaasartunut ilanngunneqarumaartoq, taassuma neriuutigaa.

- Killeqanngitsumimmi attaveqaqatigeriaasiummat inuiattut katerissutissaqqippoq, Varna Marianne Nielsen oqarpoq.

Qilaatersorneq, tivaneq inngernerlu nunarsuarmi inuiannut pingaarutilittut UNESCO-p kulturikkut kingornussanut tigussaanngitsunut allattugaataanut 2021-mi ilanngunneqarput.

Atuagaq nutaaq UNESCO-p nittartakkakkut atuagaateqarfiani aaneqarsinnaavaoq: Celebrating the living heritage of indigenous peoples - UNESCO Digital Library