Meeqqat atuartut aasaanerani qaammatini pingasuni atuanngiffeqartarnissaannut siunnersuut isornartorsiorneqartoq
Klassimi atuartut agguaqatigiissillugu amerlassusaasa ikilisinneqarnissaat, aasaanerani qaammatini pingasuni atuanngiffeqartarnissaat, 3. aamma 7.klassimi alloriarfinni allattariarsornermi pinngitsuugassaanngitsunik misilitsissutinik qitiusumit aalajangersarneqartunik atorunnaarsitsinissaq.
Siunnersuutit taakku Inatsisartut upernaakkut ukioq manna ataatsimiinneranni siullermeerneqartussatut pilersaarutaapput.
Naallu meeqqat aasaanerani qaammatini pingasuni atuanngiffeqartarnissaannut Kuno Fenckerip(Naleqqameersup) siunnersuutaa inuusuttunut nuannaarutissaagunaraluartoq angajoqqaanut tamanna allaaneruvoq.
- Meeqqat taama sivisutigisumik atuanngiffeqassagunik, taavami? Sumi? Angajoqqaallu feriarfigut sapaatit akunneri tallimaannaallutik, Marie Rosing Levisen, atuartunik pingasunik meeraqartoq oqarpoq.
Inersimasumik ingiallorneqaratik piniartut?
Inuiattut ileqqugut, soorlu piniarneq aalisarnerlu, meeqqatsinnut ingerlateqqinnissaat pinngortitarlu aallaaviginerullugu atuanngiffeqartarnissaq Naleqqap siunnersuummi anguniarpaa.
Maria Rosing Levisenilli angajoqqaajusutut tamanna isumaqatiginngilaa:
- Soorlu assersuutigalugu meeqqat inersimasumik ilaqarnatik, kiap angallatissagamigit?
Meeqqat aasaanerani atuanngiffeqartarnerisa maanna sivisussusaa naammaginartoq taanna isumaqarpoq.
Naalakkersuisut Kuno Fenckerimut akissuteqarnerminni ilaatigut erseqqissaatigaat ullut atuarfiusut ikinnerulernissaannut siunnersuut susassaqartunut tamanut tusarniaassutigineqareersoq, siunnersuullu siammasissumik isornartorsiorneqartoq.
Nuummut ilinniartitsisussaaleqereersumut ajornartorsiutaanerulissasoq
Atuartut klassimi amerlanerpaamik 18-iunissaannut siunnersuut, allattariarsornermilu pinngitsuugassaanngitsunik misilitsissutinik qitiusumit aalajangersarneqartunik atorunnaarsitsinissamut siunnersuutit Demokraatit sinnerlugit Inatsisartunut ilaasortanit saqqummiunneqarput.
Atuartut klassimi ataatsimi ikilisinneqarpata tamanna atuartut atuagarissaarnerulernissaannik kinguneqassasoq partii isumaqarpoq.
Siunnersuulli aqqutigalugu meeqqat atuarfiannut aningaasartuuteqarnerulersitsissasoq Naalakkersuisut erseqqissaatigaat.
Assersuutigalugu Nuummi atuartut klassimiittut amerlassusaannik ikisiisoqarniarpat ilinniartitsisunik amerlanerusunik pisariaqartitsisoqalissaaq, Nuummimi klassit 18-init amerlanerusunik atuartullit tamaani amerlanerpaammata.
Tamanna ilinniartitsisunik pisariaqartitsinerulernermik kinguneqassaaq. Ilinniartitsisunik amigaateqarfioreersumi naatsorsuutigineqassaaq taamatut annertusaaneq nunap immikkoortuisa sinnerinit imaluunniit nunanit allanit ilinniartitsisussarsiornermik matussuserneqartariaqassasoq, tamatumalu kingunerisaanik sumiiffinni allani ilinniartitsisussaaleqineq annertunerulissalluni, Naalakkersuisut akissumminni ilaatigut allapput.
Siunnersuutit saqqummiunneqartut qulequttanik pingaarutilinnik meeqqat atuarfianni atuakkat pitsaanerulernissaannut tikkuussisut Naalakkersuisut isumaqarput.
Taamaammat meeqqat atuarfianni aaqqissuusseqqinnissamut suliaqartussanik suleqatigiissitaliortoqarnissaa Naalakkersuisut taamaammat siunnersuutigaat.
Siunnersuutit pingasut Inatsisartuni sapaatit akunnerata siuliani oqaluuserineqartussaagaluarput, ulluligaanngitsumilli maanna kinguartinneqarlutik.
