Danmarkimi naalakkersuisut: Meeqqat akunnerni ikinnerusuni atuartinneqassapput

Danmarkimi meeqqat atuartut siunissami sivikinnerusumik atuartalissapput. Taarsiullugu akunnerit ilaanni amerlanerusunik ilinniartitsisoqartassasut Danmarkimi naalakkersuisut siunnersuuteqarput.

Allattoq Ritzau, Helle Nørrelund Sørensen

oktobarip 10-at 2023 09:49

Nutserisoq Paornánguak Kleist

Danmarkimi meeqqat atuartut sivikinnerusumik siunissami atuartalissapput.

Taama Danmarkimi Naalakkersuisut sapaatip akunnerani matumani siunnersuutaasa ilaat nipeqarpoq.

Danmarkimi meeqqanut atuartitsinermullu ministeri Mattias Tesfaye (S) naapertorlugu børnehaveklassemiit 9. klassep tungaanut akunnerit atuartitsiffiusut 200-t missaannik ikilisinneqassapput.

Piffissarlu atuarfiusoq sivikinnerusinnaavoq. Naalakkersuisuniimmi pilersaarutigineqarpoq børnehaveklassemiit 9. klassemut akunnerit 1500-t atuarfinnit qaavatigut peerneqassasut.

Akunnernik piiaanikkut aningaasat atuarfinnit sipaarutigineqartut akunnerni atuartitsiffiusut ilaanni marlunnik ilinniartitsisoqarnissamut atorneqassapput.

Akunnerit atuartitsiffiusut ikilineqarnissaannik siunnersuut Danmarkimi meeqqat atuarfiannik 2013-imi iluarsaasseqqinnermi pilersaarutigineqartunut akerliulluinnarpoq, taamani ulloq atuarfiusoq sivitsorneqarmat.

Aamma atuarukManiitsumi atuartut nutaamik atuarfittaassanngitsut

Tamannali iluatsissimanngitsoq meeqqanut atuartitsinermullu ministeri Mattias Tesfaye isumaqarpoq.

- Sivisuumik atuarfimmiinnermut taarsiullugu piffissap atuartitsiffiusup pitsaassuseqarnissaa pingaarneruvoq. Taamaammat ullup atuarfiusup sivikillineqarnissaa illuatungaanili akunnerit atuartitsiffiusut ilaanni marlunnik ilinniartitsisoqartarnissaa ajunngivissoq isumaqarpunga.

Danmarkimi ilinniartitsisut kattuffianni Danmarks Lærerforeningimi siulittaasup Gordon Ørskov Madsenip siunnersuut tapersersorpaa.

- Kommunini ullut atuarfiusut taamak sivisutiginissaat akissaqartinneqannginnerat misigisimavarput. Imaappoq tinguaraq saattuaqqamik tarngunneqarsimavoq.

- Ullormut atuarnerup sivikinnerunissaa taamaammat isumassarsiatsialaavoq. Akunnerit ikinnerusut pitsaanerusullu pitsaanerussapput, siulittaasoq Gordon Ørskov Madsen oqarpoq.

Statsministerip Mette Frederiksenip Danmarkimi meeqqat atuarfiannik arlalinnik allannguisoqarnissaanik pilersaaruteqartoq oqaatigisimavaa. Atuarfiit namminneq aalajangiisinnaanissaat ilaatigut oqaatigineqarsimavoq.

Naalakkersuisut siunnersuutaat Christiansborgimi maanna suliarineqartussanngorpoq.

Nutaarsiassami kukkunermik nassaarsimaguit uunga allaffigineqarsinnaavugut.