Martin Breum: Issittumi aallartitatut atorfik suli inuttalerneqanngilaq

Issittumi aallartitanngortitanngortitaagaluartoq allaffimmi pisortatut atorfinitsinneqaannarsimasoq, tusagassiortoq atuakkiortorlu Martin Breum oqarpoq.

Allattoq Thor Bill

septembarip 04-at 2023 17:03

Nutserisoq Najâraq Egede

Danmarkip danskeq, Tobias Elling Rehfeld, Issittummi upernaaq aallartitanngortimmagu isorinnittut ikinngillat.

Kisianni Tobias Elling Rehfeldil Issittumi aallartitanngunngiinnartoq paasinarsivoq. Naalagaaffeqartigiinneq pillugu arlalinnik atuakkiorsimasoq tusagassiortorlu Martin Breum ataasinngornermi oqarpoq.

- Paasisakka naapertorlugit allaffimmi pisortaq nutaaq, Issittumut Amerikallu Avannaanut tunngasunut immikkoortortami, Tobias Elling Rehfeldt-imik atilik sulilersimavoq. Atorfilittaq aallartereerpoq. Taassumalu suliassaasa ilagai aallartitatoqqap suliarisarsimasarpassuisa nanginnissaat, issittumi aallartitatut taaguteqanngikkaluarluni, Martin Breum KNR-imut oqarpoq.

Aamma atuaruk Akisoqanngilaq: Issittoq pillugu aallartitaq nutaaq aallartippa?

Danmarkimi nunanut allanut ministereqarfiup sulisuisa allattorsimaffianni Tobias Elling Rehfeld allaffimmi pisortatut allassimavoq.

- Nunanut allanut ministereqarfimmi allaffimmi pisortatut sulerpasippoq, soorlu issittumi aallartitaasimasoq taama pisoq. Aamma Nunanut Allanut Naalakkersuisoqarfimmut Nuummiittumut attaveqaataavoq. Kalaallit Nunaat Danmarkilu suleqatigiittuarsinnarput. Kisianni tassa Kunngeqarfimmi Danmarkimi Issittumi aallartitatut atorfik immikkut ittoq inuttaqanngilaq. Tobias Elling Rehfeld suli atorfininngimmat, Martin Breum oqarpoq.

Aallartitassaq suli oqallissutaavoq

Martin Breumip oqarnera naapertorlugu Kalaallit Nunaata Danmarkillu akornanni, Issittumi ambassadørissaq qanoq suleriaaseqassanersoq oqallissutaavoq. Suliassat iIaatigut naalagaaffeqatigiiit sinnerlugit Nunat tamalaat ataatsimiinneranni oqalugiarnissanut tunngapput. Akisussaaffiit pisussaaffiillu qanoq agguataarneqassanersut uani pineqarpoq.

Pisullu ukiuni tullerni marlussunni malinnaaffigisariaqarsinnaapput. Kunngeqarfiummi Danmarkip – Kalaallit Nunaata, Savalimmiut Danmarkillu ataatsimoorlutik, Issittumi Siunnersuisoqatigiinni siulittaasuuffik tigusussaavaa. Tassungalu atatillugu, kina Issittumi aallartitatut issianersoq, siunissami pisussani apeqqutaasorujussuussaaq, Martin Breum oqarpoq.

ISSITTOQ PILLUGU AALLARTITAQ SULERISUUA?

Issittoq pillugu aallartitaq Danmarkip nunanut allanut mintereqarfiani Københavnimiittumi allaffeqarpoq, taannalu ministereqarfiup Issittoq aamma Amerika Avannarleq pillugit immikkoortuata pisortaatut atorfeqarpoq.

Taanna Kunngeqarfiup, Savalimmiut Kalaallit Nunaata ataatsimoorussamik nunanut allanut politikkiannik taavalu USA-mik Canadamillu suleqateqarnermik aamma ataqatigiissaarisuuvoq.

Aamma Naalagaaffeqatigiit sinniisuuffigalugit atorfillit Issittumi Siunnersoqatigiillu ataatsimiinneranni peqataasarpoq.

Issittoq pillugu 2012-ip 2023-llu akornanni aallartitaasut ukuupput:

Klavs A. Holm (2012 - 2013)

Erik Vilstrup Lorenzen (2013 - 2016)

Hanne Fugl Eskjær (2016 - 2019)

Thomas Winkler (2019 - 2023)

2023?

Allisiguk

- Tassunga atatillugu, naalagaaffeqatigiit pingasut sinnerlugit kina inimut isertussani saarliusassanersoq, oqaaseqartittagaallunilu isumaqatiginninniartartuussanersoq paasissallugu pingaaruteqarpoq. Kalaallit Nunaammi aamma immikkut soqutigisaqartoq takorloorneqarsinnaavoq. Nuummit aalajangiusimaneqarpoq, issittumi aallartitassaq kalaallinit kingoqqisuussasoq. Aalajangiusimaneqartorli suli naammassineqanngilaq, oqarpoq.

Piffissaq sivisusinnaasoq

Danmarkimi nunanut allanut ministeriup, Lars Løkke Rasmussenip (M), siornatigut kalaallit aallartitassap kinaanissaanik aalajangeeqataanissamut sunniuteqassanngitsut oqaatigaa. Kisianni Nuummi naalagaaffeqatigiit siuttui aasaq naapereersullu nipisiassaq allanngorpoq.

Danmarkip statsministeriata, Mette Frederiksenip (A), issittumi aallartitassap oqallissutaanerata nanginnissaa ammaffigaa.

Aamma Lars Løkke Rasmussenip uppernarsarpaa, aaqqissuteqarnissaq angutserlugu suliaq nanginneqassasoq, "Kalaallit Nunaat nuna sinnerlugu aallartitaqarnissamik aamma pisussaaffeqarpoq".

Danmarkimi nunanut allaanut ministereqarfinnit ilisimatitsissutigineqarpoq, issittumi aallartitassatut atorfiup inuttalernissaa suli oqallisigineqartoq.

Martin Breumip oqarnera naapertorlugu atorfimmut tunngatillugu isumaqatigiinniutissat pigineqareersut. Kisianni suliap naammassinissaanut piffissaq sivisusinnaasoq, isummersorpoq.

- Ministerip una aalajangiiffigisassaraa. Peqatigiillutillu aalajangiisussat tassaanerupput nunanut allanut naalakkersuisuoq Vivian Motzfeldt aamma Danmarkimi nunanut allanut ministeri Lars Løkke Rasmussen, oqarpoq.