Makkorsip oqaluussissutaa teologip uparuaraa: Peqqarniitsoq kristumiorpalaanngitsorlu
Naqqiut: Henriette Have upperisarsiornermi teologitut bacheloriuvoq palasitullu sulisimalluni. Qasigiannguani Qaanaamilu palasitut sulisimavoq. Palasitulli maanna sulinngilaq, taamaammat allaatigisap uuma qulequtaani qulequtaaraanilu oqaaseq “palasi” “teolog”-inngortillugu naqqipparput.
Nuummi palasi Markus E. Olsen juunip 21-iani inuiattut ullorsiornermi naalagiartitsinermini qilaatersortitsisimanini pillugu palasitut suliunnaarallartinneqarpoq.
Tamatumalu saniatigut naalagiartitsinermi periusereqqusaasut naapertorlugit qinnussinermi naalakkersuisut kunngikkormiullu aamma ilanngussimanngilai.
Henriette Have upperisarsiornermi 2015-mi bachelorinngorpoq, Qasigiannguanilu palasitut sulisimalluni maannalu Norgemi teologimut qaffassarluni kandidatitut ilinniaqilluni.
AAMMA ATUARUK Oqaluffimmi inatsisilerinermik ilisimasalik: Markus E. Olsen suliunnaarallartinneqartariaqanngikkaluarpoq
Taanna isumaqarpoq, Markus E. Olsenip inuiattut ullorsiornermi oqaluussinera kristumiorpalaanngitsoq aammalu politikkerpallaartoq.
- Youtubekkut tusarnaarnerani oqaluussissutaa kristumiorpalaanngingaarmat aalassaatigaara. Tikkuartuingaatsiarpoq, tamannalu oqaluussinermi mianersuussassaavoq, Henriette Have oqarpoq.
Markus E. Olsen palasitut maanna suliunnaarallaqqatinneqarpoq.
Tassa imaappoq, suliartornissaminut pisinnaatitaanngikkallartoq.
Sermitsiaq.ag naapertorlugu palasip sooq suliunnaarallartitaanera kalaallit ilagiit paasitinneqarsimanngillat.
Tusarfik tutsuiginartoq naapertorlugu Markus E. Olsenip oqaluffimmi qilaatersortoqarnissaanut qinnuteqarsimannginnera naalagiartitsinermillu allannguinissamut akuersissuteqarfigineqarsimannginnera pissutigalugit suliunnaarallarsinneqarpoq.
KNR-ip nunatsinni ilagiinni ilaasortat arlallit oqaloqatigai. Taakkulu isumaqataanngillat.
Markus E. Olsenip oqaluussinermini kingulliugallartumi meeraanerminni misiliutaasimasut aammalu spiralilersuisimanerit akuersaarneqartussaanngitsutut taavai, tamannalu naalagaaffimmut maniguuppallaarsimanerup kingunerigaa erseqqissaatigalugu. Tamatumalu saniatigut aamma Saammaateqatigiinnissamut isumalioqatigiissitap sulinera iluatsissimannginnerarpaa.
Taamatuttaaq Markus E. Olsenip oqaluussinera Henriette Havemut sakkortuutut peqqarniitsutullu misinnarpoq inuttullu mikisuararsuartut misigititsilerluni.
Sakkortullunilu peqqarniippaluttoq
Henriette Havep iluaagisaanut ilaavortaaq Makkorsip oqalugiutaa sakkortuallaarsoralugulu peqqarniitsutut misigigamiuk, taamaanneratalu Henriettemut mikisutut misigilersitsivoq.
- Isumaqarpunga oqaluussissutaa sakkortuallaarlunilu peqqarniippallaartoq. Taamaammalluuna uannut mikisuararsuartut misigilersitsimmat maanna qisuariartariaqartunga, nipaami aamma sakkortuvoq, kalaallillu sanngiitsutut taakkartorpai, taamatullu kusanaatsumik nipaqarnera aalassaatigaara, Henriette Have oqarpoq.
AAMMA ATUARUK Dorthea akerliunermik aallartitsivoq: Oqaluffimmut suaaruteqarnissamut tunngavoq
- Kalaallit sanngiitsuunerarpai, tamannalu tupaallaatigaara nalunnginnakkumi aamma tamanna ilumuunngitsoq. Palasitummi ilisimavara ilaqutariippassuaqartoq angerlarsimaffimminni qitornamik innarneranni qinnussisartunik aammalu tussiartartunik. Amerlaqaat kristusimik oqaluttuamik ilisimaarinnittunik aammali naalagiarneq ajortut arlaqaqaat.
- Taamaattorli aamma Jesusimit paarineqarnerput pillugu upperinnittoqaqaaq taamaammallu qitornaminnut tamatuminnga ingerlatitseqqeerusuttunik, tamannalu illuatungilerneqarpat nipimik: `sanngiippusi meeqqasilu upperunnaarput, tamanna ilumuunngilluinnarpoq, taamaassorinngilluinnarparami.
Qilaat Guutip illuani? naagga.
Palasip allap oqaluuserineqartaqisup Hans Egedep ukiut 300-t matuma siorna qilaatip oqaluffimmi atorneqarnissaa inerteqqutaatilerpaa, taamanili oqaluffimmi qilaatip nipaa sakkortooq ingalassimaneqalerpoq.
Henriette Haveli naapertorlugu, imaanngilaq palasip taassuma danskiullunilu norskiusup inerteqqutiginnitsilernera tamatumunnga aalajangiisuusoq. Henriette Havelu naapertorlugu qilaat oqaluffimmut Guutip illuanut tulluanngilaq.
- Qilaat anersaarsiornermik allamik imaqarpoq, taamanikkut kalaallit allamik upperisaqarmata.
- Taamanilu upperisaq nutaaq takkuttoq aamma allarluinnaavoq. Qilaallu oqaluffimmi atorneqaqqittalissappat taava oqaluffimmi atussallugu tulluartuusoraarput? allamimi oqaluffimmiunngitsoq atorneqakutsoorsinnaavoq, Henriette Have oqarpoq.
Markus E. Olsenilu suli soraarsitaanngilaq. Taanna soraarsinneqarnissamut allagarsiani pillugu nunatta biskoppianut kingusinnerpaamik aggustip sisamaanni akissuteqartussaavoq.
AAMMA ATUARUK Nunatsinni palasini oqallisaanerpaaq: Annaasassaqanngilanga
Biskoppilu Markus E. Olsenimik suliunnaarallartitsisuusoq aamma tamanna pillugu akissuteqartussaavoq, taamaalioreerpatalu Markus E. Olsen palasitut atorfeqaannassanersoq soraarsitaassanersorluunniit aalajangerneqassaaq.
Markus E. Olseníp angajoraa Oqaluffeqarnermut naalakkersuisoq Peter Olsen.
