Palasi suliunnaarallartitaasoq: Ilagiit sinniisaasa assigiinngitsunik isummerfigaat
Nuummi palasi Markus E. Olsen, palasitut suliunnaarallartitaavoq.
Sunalu peqqutaanersoq, palasimit namminermit biskopimiillu oqaatigiumanqanngilaq. Inunnut ataasiakkaanut tunngassuteqarmat biskopi oqaaseqarsinnaanani KNR-imut ilisimatitsivoq.
Nunattali sineriaani ilagiit sinniissaasa siulittaasui arlallit KNR-imiit attaveqarfigaagut.
Nunatsinni palasit oqaluffimmi najoqqutassaqartarput. KNR-imiilli paasisagut naapertorlugit najoqqutassanit allaanerusumkik nalagiartitsissagaanni, soorlu qilaatersorluni, taava biskopeqarfimmut qinnutigineqaqqaassaaq akuerineqarlunilu.
Palasi Markus E. Olsen inuiattut ullorsiornitsinni naalagiartitsivoq, naalagiartitsinera aamma KNR radiokkut toqqannartumik aallakaatinneqarpoq.
Tassanilu qilaatersortitsisimallunilu, qinnussinermini kunngikkormiut eqqaasimanngikkai maluginiarlugit ilagiit sinnisaannut ilaasortat arlallit KNR-imut oqaluttuarput. Tamannarpiarli suliunnaarallartitaassutigineraa uppernarsaammik KNR-imi pinngilagut.
Ilagiillu sinniisaanniit isummat assigiinngitsut saqqummiunneqarput.
- Palasi atorfinitsinneqaraangami taavalu sulilertussaagaangami, tamatiguuik inatsisinik, inatsisartut suliaannik, malitassaqarput.
- Sumiluunniimmi atorfinikkaangatta malitassaqartarpugut, malitassagut uniorutsigit soraarsitaasarpugut, imaluunniit peersitaasinnaavugut, Ilulissani ilagiit sinniisaanni siulittaasoq, Martha Sivertsen oqarpoq.
Tamatta kukkusinnaatitaavugut
Uummannamili ilagiit sinniisaata siulittaasuata tamanna isumaqatiginngilaa. Inuimmi tamatta kukkusinnaatitaasugut, taanna isumaqarpoq.
- Tamatta sumiluunniit atorfeqaraluarutta inatsiseqarpugut maleruagassatsinnik. Kinaluunniit sumiluunnit kunngikkormiuugaluarutta, asaasukuluinnaagaluarutta inatsisit malikkaluarutsigit aamma kukkusinnaatitaasarpugut, Marianne Løvstrøm oqarpoq.
- Kukkusoqartarpoq inatsisilerituujugaluaruttaluunniit. Makkorsip kukkuluttorsimanera ajuusaarnaraluarpoq, taanna aamma inuttut ataqqisariaqarpoq kukkusimanera isumakkeerfigineqarnissaalu. Soorlu guutip oqaasianik allassimasoqarpoq isumakkeerfiginnigitsi, ajattarnagu.
Nunatsinni palasit allat taamaattussaagaluarput
Tasiilami ilagiit sinniisaasa siulittaasuat ulloq taanna angerlasimalluni radiokkut naalagiaqataavoq.
Taanna immikkut maluginiagaqarpoq.
- Uanga radiokkut naalagiarama misigisimavunga; kakkaak soorlu eqiiallannartoq. Oqaasii ersaringaarmata, tassani eqqarsalerpunga, tassa taamatut uagut kalaallit naalagiartartussaagaluarpugut, taamaalilluni immaqa aamma inuusuttut naalagiartartut amerlissagaluarput, paasinarsakkanik oqaluunneqartarunik. Taannartaa assut torrageqaara, naalagiarnermi oqaasii.
- Kisianni kunngikkormiut eqqaaneqannginnerat immaqa uagut kalaallit inuiattut ullorsioriaratta eqqaanngikkai. Taamaakkaluarpalluunniit kunngikkormiut ataqqinartorsuummata eqqaaneqannginneri eqqumiigilaarpara, Tasiilami ilagiit sinniisaasa siulittaasuat, Elisa Nuko KNR-imut oqarpoq.
Markus E. Olsenip naalagiartitsinera uani isiginnaarsinnaavat.
