Dorthea akerliunermik aallartitsivoq: Oqaluffimmut suaaruteqarnissamut tunngavoq

Dorthea Isaksen eqalunnik tisaleruttorpoq, taamaakkaluartorli Markus E. Olsenip suliunnaarallarsinneqarnerata oqaluuserinissaa pingaarneruvoq.

- Markusip naalagiartitsinermini biibilimi allassimasut nunatsinni, inuunitsinni inuiaqatigiinnilu pisimasut naleqqiuttarpai, taamaammat tamanna inuit paasisinnaavaat. Taamaammat inuit tusarnaarlutillu paasinnittarput, Dorthea Isaksen palasip inuiaqatigiinni aalassassutigineqartumik suliunnaarallartinneqarnera pillugu oqarpoq.

Nuummimi palasimik suliunnaarallartitsinermi palasip Markus E. Olsenip suliunnaarallartinneqarneratulli ukkataqartoqartiginikuunngilaq.

Inuit 700-init amerlanerusut Nuummi palasip suliunnaarallarsinneqarnera pillugu Dorthea Isaksenip atsiortitsinermik katersileranut atsiorsimapput.

Markus E. Olsen Nuummi palasiuvoq, taanna inuiattut ullorsiornermi naalagiartitsinermi malittarisassanik unioqqutitsisimagunarnerata kingorna suliunnaarsinneqarpoq.

Tusarfiup tutsuiginartup oqarnera naapertorlugu tamanna Markus E. Olsenip oqaluffimmi qilaammik atuinissamut naalagiartitsinermillu allanngortitsinissamut akuersissummik qinnuteqarsimannginneranik pissuteqarpoq. 

Biskoppip, Paneeraq Siegstad Munkip suliaq inunnut ataasiakkaanut tunngasuunera pissutigalugu oqaaseqarfigisinnaanagu KNR-imut siusinnerusukkut oqaatiginikuuaa.

Dorthea Isaksenilli suliaq Markus E. Olsenimut kisimi tunngannginnerarpaa. Suliarmi oqaluffimmut suaaruteqarnissamut tunngavoq.

- Isumaqarpunga kristumiuussuseq nunatsinni ullutsinni inunnut ungasillingaatsiarsimasoq, Dorthea Isaksen oqarpoq.

Inuit 500-it ullormi ataatsimi atsiortut

Dorthea Isaksen Sisimiuni najugaqarpoq. Taassuma Markus E. Olsenip aqqusineq peroriartorfigisaa peroriartorfigaa, ullumikkullu tassunga qaminut attaveqanngilaq.

Taamaakkaluartorli suliunnaarallarsinneqarnerani iliuuseqartariaqartutut misigisimavoq. Taassuma Markusip naalagiartitsineri sapaatit tamaasa tusarnaartarpai nuannaralugillu.

Taannalu suliunnaarallartitsisoqarneranut akerliusuni kisimiinngitsoq ersarippoq.

- Ullup ataatsip ingerlanerani 500-it sinneqartut atsiornera tupaallaatigingaatsiarpara. Ullut marluunngitsulluunnit 800-ngajaat atsiorput. Tamanna tupaallaatigingaatsiarpara. Neriuppunga amerlanerusut atsiussasut, Dorthea Isaksen oqarpoq.

Atsiornerit saniatigut amerlasuut sooq Markus E. Olsenip palasitut sulilerseqqinnissaanik isumaqarnerminnik oqaasertaliipput.

- Markusimik suliunnaarallartitsisut oqaasertaliinerit atuassagaat aamma oqaluffiit palasillu ullumikkut ullutsinni inuuneq pillugu oqaaseqartarnerat biibilimeersumullu sanilliussisarnerat qanoq pingaaruteqartiginersoq paasisinnaassagaat neriuutigaara, Dorthea Isaksen oqarpoq.

Taassuma Markus E. Olsenip naalagiartitsinermi qilaateqarnera ajoriffissartaqanngissoraa.

- Isumaqarpunga inuit oqaluffimmi imminut ilisarisinnaanerutillugit qilaatip atorneqarnera pitsaasuusoq, taanna oqarpoq.