Assi: KNR

Oqaluffimmi inatsisilerinermik ilisimasalik: Markus E. Olsen suliunnaarallartinneqartariaqanngikkaluarpoq

Palasi Markus E. Olsen naalagiartitsinermini qilaatsersortitsiniarnini ilagiit sinniisaannut apeqqutigeqqaartariaqanngikkaa, oqaluffimmi inatsisilerinermik ilisimasalik isumaqarpoq. Qinnussinermili malitassat malillugit qinnussinissani malissimanngikkaa aamma oqaatigaa.

Nuummi palasi Markus E. Olsen, palasitut suliunnaarallartitaavoq.

Tamanna inuiattut ullorsiornitsinni naalagiartitsinermini qilaatersortitsisimaneranik, taamatullu qinnussinermini Kunngeqarfik naalakkersuisullu ilanngussimannginneranik peqquteqartoq, KNR tusarfimmit tutsuiginartumit tusartinneqarpoq.

Biskopeqarfimmiilli inunnut ataasiakkaanut tunngasunut oqaaseqarsinnaanatik KNR-imut ilisimatitsipput.

Nunatsinni palasit oqaluffimmi najoqqutassaqartarput. KNR-imiilli paasisagut naapertorlugit najoqqutassanit allaanerusumik naalagiartitsissagaanni, soorlu qilaatersorluni, taava biskopeqarfimmut qinnutigineqaqqaassaaq akuerineqarlunilu.

AAMMA ATUARUK Palasi suliunnaarallartitaasoq: Ilagiit sinniisaasa assigiinngitsunik isummerfigaat

Palasi Markus E. Olsen inuiattut ullorsiornitsinni Nuummi naalagiartitsivoq, naalagiartitsinera aamma KNR radiokkut toqqaannartumik aallakaatinneqarpoq.

Taanna naalagiarnerup nalaani qilaatersortitsillunilu qinnussinermini kunngeqarfik naalakkersuisullu qinnutinngilai.

Tamannalu peqqutaalluni suliunnaarsitaagallartoq, tusarfik tutsuiginartoq KNR-imit oqaluussatta uppernarsarpaa.

Markus E. Olsenip taamatut naalagiartitsisimanera pillugu inatsisilerituumit, oqaluffimmi inatsisilerinermik ilisimasalimmit qanoq isumaqarfigineqarnersoq paasiniarparput.

- Uanga isummanni pissanganarpaluppoq. Oqaluffimmi inuiaat pigaat, oqaluffiullu ineriartornissaa uummaarissuunissaalu pingaarpoq. Oqaluffiullu inuiannut akuunissaa pisariaqarluinnarpoq, Morten Nornild oqarpoq.

Inuiattut ullorsiornermi naalagiarneq kippareqqissaartariaqanngitsoq

Naalagiarnermili tassani qilaatersortoqarsimanera ilaatigut tunngavigineqarluni palasi Markus E. Olsen suliunnaarallartitaasoq, tusarfimmit tutsuiginartumit KNR-imi paasitinneqarpugut.

Matumani Ilageeqarneq pillugu Inatsisartut inatsisaat najoqqutarineqarpoq. Palasimmi ajoqiluunniit naalagiarnerni aalajangersimasuni ileqqorisat ritualilluunniit allannguuteqalaartissappagit, ilagiit sinniisaannit Biskoppimiillu akuerineqaqqaarnissaa piumasaqaataavoq.

Taannarpiarlu Inatsit tunngavigineqartoq, ilagiinni palasitut ilaatigut ilinniartitsisuusimasup ima paasivaa.

- Naalagiartitsinerup aalajangersimasup allanngorterujussuarneranik taanna qitiusumik isumaqarpoq. Palasimik killilersuinissamut atortussaanngilaq, assersuutigalugu inuiattut ullorsiornermi, Morten Nornild oqarpoq.

Palasilu naalagiartitsinermini qilaatersortitsissaguni ilagiit sinniisaannut apereqqaarsimasariaqanngitsoq, taanna, aamma biskoppeqarfimmi allaffimmi pisortatut ukiut qulit missaani sulisimasoq, isumaqarpoq.

- Ilagiit sinniisaannut aperisoqartariaqanngitsoq eqqarsarpunga. Naalagiarnermi aalajangersimaqqinnaartumik ataatsimi, tassalu inuiattut ullorsiornermi, palasiunermi oqaluussinermi oqaatiginiakkap paasitilluarusunnerani nammineq periuseqarsinnaanermiittoq isumaqarpunga.

Palasi Markus E. Olsen inuiattut ullorsiornermi naalagiartitsinermini qinnussigami Kunngeqarfik naalakkersuisullu ilanngussimannginneri suliunnaarsitaagallartinneqarneranut aamma tunngavigineqartoq, KNR-imiit tusarparput. Naalagiartitsinermi najoqqutarineqartartup Ritualip malinneqannginnera tunngavilersuutigineqarluni. Ritualimilumi tamanna allassimammat, palasit ataasiakkaat tamanna minissinnaanngikkaat, inatsisileritooq oqarpoq.

Morten Nornild pillugu:

 

  • Biskopeqarfimmi allaffimmi pisortaq 2010-2019
  • Biskopeqarfimmi immikkut siunnersorti 2008-2010
  • Pastoralseminariami ilinniartitsisoq
  • Ajoqinngornianut iliniartitsisoq
  • Rigsombudimi eqqartuussiveqarnermut pisortaq
  • Ilisimatusarfimmi lektori

- Suliaq taanna aalajangersimasoq ilisimasaqarfiginnginnakku erseqqissaatigissavara, taamaakkaluartorli palasi qinnussinermini minitaqarsimaguni, ullormi sulinermini annikitsumik kukkusimassaaq. Ullormullu sulinermi annikitsumik kukkusimagaanni, taava kingunerisassaata aamma annikitsuusariaqaraluarpoq.

-Inuiaammiuku oqaluffiat, taamaammat inuiaat oqaluffiata inuiaat suna perusunneraat tusarnaassagaa pingaaruteqarpoq. Upperisamik nassuerutiginninnermut tunngavik soorunami aalajangiusimasassaavoq, taassumali iluani aamma oqaluffiup inuiannut malinnaasuutinnissaanut periarfissaqarpoq.

Palasip Markus E. Olsenip suliunnaarallartitaanera pillugu biskoppi Paneeraq Siegstad Munk saaffigigaluarparput, sulisunulli ataasiakkaanut tunngasumik oqaaseqarsinnaannginnini tunngavilersuutigalugu oqaaseqarumanngilaq.

Markus E. Olsenip naalagiartitsinerani immiussaq uani isiginnaarsinnaavat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl