Nunatsinni palasini oqallisaanerpaaq: Annaasassaqanngilanga
Nunatsinni palasini oqallisaanerpaaq qaammatip siulianili nipangersimareerluni maanna isummersorpoq.
Markus E. Olsen inuiattut juunip 21-anni ullorsiornitsinni qilaatersornertalimmik naalagiartitsereerami Nuummi palasitut suliunnaarallartitaavoq.
Ilagiillu kalaallit ritualiat naapertorlugu palasitut kunngikkormiut naalakkersuisullu oqaluussinermini ilanngutussaagaluarlugit taamaaliunngilaq.
Taamaalioreeramili nipangersimareerluni maanna isummersorpoq.
- Taamarujuk kinguneqarnissaa naatsorsuutigisimanngikkaluarpara. Arlaatigut kinguneqartinneqassasoq soorunami naatsorsuutigisimavara. Kisianni taamarujuk, 1,2,3 oqaloqatiginninnertaqanngitsumik mianersoqqussummillu tunisinertaqanngitsumik isimmiinnarneqarnissara naatsorsuutigisimanngilara, taanna KNR-imut oqarpoq.
Markus E. Olsen palasitut maanna suliunnaarallaqqatinneqarpoq.
Tassa imaappoq, suliartornissaminut pisinnaatitaanngikkallartoq.
Sermitsiaq.ag naapertorlugu palasip sooq suliunnaarallartitaanera kalaallit ilagiit paasitinneqarsimanngillat.
Tusarfik tutsuiginartoq naapertorlugu Markus E. Olsenip oqaluffimmi qilaatersortoqarnissaanut qinnuteqarsimannginnera naalagiartitsinermillu allannguinissamut akuersissuteqarfigineqarsimannginnera pissutigalugit suliunnaarallarsinneqarpoq.
KNR-ip nunatsinni ilagiinni ilaasortat arlallit oqaloqatigai. Taakkulu isumaqataanngillat.
- Atorfinnut tunngatillugu angusaqarfiunngilaq. Atorfinnut tunngatillugu pilliutaavoq.
Markus E. Olsenilu suli soraarsitaanngilaq. Taanna soraarsinneqarnissamut allagarsiani pillugu nunatta biskoppianut kingusinnerpaamik aggustip sisamaanni akissuteqartussaavoq.
Biskoppilu Markus E. Olsenimik suliunnaarallartitsisuusoq aamma tamanna pillugu akissuteqartussaavoq, taamaalioreerpatalu Markus E. Olsen palasitut atorfeqaannassanersoq soraarsitaassanersorluunniit aalajangerneqassaaq.
Qilaatersortitsinera oqaluussissutinnut ilaasoq
Biskoppillu taama qisuariarnera, Markus E. Olsenip naammaginartinngilluinnarpaa.
- Pissusissamisoorsimassagaluarpoq, biskoppip allaffigisimappanga ’Makkorsi ippassaq naalagiartitsinerit pillugu oqaloqatigilaarniarpakkit. Imatut imatullu iliorputit, sooruna taamaaliortutit? Taanna pillugu oqaloqatigilaarniarpakkit.’ Taanna pissusissamisuussagaluarpoq. Kisianni pissusissamisoorunnaarpoq, erngertumik suliunnaarsikkaminga, sumilluunniit oqaloqatigiinnermik nassataqartinnagu, taanna oqarpoq.
AAMMA ATUARUK Ekspert om suspendering af præst: Der er tale om en mindre fejl, som bør udløse en mindre konsekvens
Ilagiit kalaallit naalagiarnermi rituaalianni Kunngikkormiut naalakkersuisullu taaneqarnissaat ilaavoq. Inngertoqarsinnaavoq, taamaaliunnginnermili akuersissuteqaqqaassaaaq.
Sooruna rituaali maliinnangikkit?
- Qilaatersortitsinera uanga nammineq palasitut kiffaanngissuseqarlunga pisinnaatitaaffigaara, oqaluussissutinnut ilaammat, taanna akivoq.
- Nipaatsumik suliarinikuuara una, palaseqatikka oqaluttuunnikuunngilakka qanoq iliorniarlunga. Pissutigalugu immaqa aamma amerlanerpaartaatigut taamatut sulivugut palasit. Oqaluussissutigut kisitta suliarisarpagut. Tussiutissagut nammineq suliarisarpagut, soorunami isumasioqatigiilaartarpugut arlaatigut. Ukiutoqaq inuiattullu ullorsiornermi namminiissuseqarluta, taannalu atorluakutsukutsoorpara.
Dronningi sooq taanngitsoorsinnaassanngilarput?
Markus E. Olsen Danmarkimi ilinniarsimasuuvoq. Danmarkimilu palasit oqaluussinerminni naalakkersuisut Kunngikkormiullu taanngitsoorsinnaavaat.
- - Sooq taava uani allaanerusimassava? Qallunaat palasiisa dronningi minissinnaappatigit sooruna uagut taamaaliorsinnaanngitsugut, Markus E. Olsen aperivoq?
Assi Itsumarlo Parlo Studiop Youtubemi siammartigaaneersoq.
Markus E. Olsenip oqaluussissutaa qisuariartitseqaaq. Allaat taanna atorfimminiiginnaarsinnaqqullugu atsiornernik katersisoqarpoq. Allaaserisap uuma allannerani (tallimanngornermi nalunaaqutaq 15) inuit 1002-t atsiorsimapput.
- Nalunngilara inuppassuit qisuariarrapput, aamma tapersersuisorparpassuit misigivakka. Aamma taamatut assinganik akerliliisoqarpoq. Taamaattuaannarpoq. Ima amerlatigisut tapersiisimappata, aamma ima amerlatigisut akerliliissapput.
AAMMA ATUARUK Maanna 700-init amerlanerusut atsiorput: Taamaammat Markus Olsen palasitut uterteqqikkusupparput
Markus E. Olsenip soraarsinneqarnissamut allagarsiaminut akinissaanut sapaatit akunneri marluinnanngulerput. Inuttaalu soraarsitaassangavippoq.
Sooruna maanna apersorneqarumasutit?
- Pissutigalugu paasitinneqarama oqaloqatigineqarusunngitsunga. Sulisitsisuninngaanniit oqaloqatigineqarusunngitsunga. Kattuffimma pingasoriarluni allagaqarluni kaammattoraluarpaa, allat akulerutsinnagit Makkorsilu oqaloqatigiilaaritsi, pissutsillu aaqqilaarlugit. Pissutigalugu aamma Makkorsip kukkussutaa taama angitiginngilaq, allaat soraarsittariaqarlugu. Kisianni biskoppip isumaa allamiissimagunarami. Allaat aalajangereersimalluni soraarsinniarlunga. Taamaattumik soraarsinniarlunga aalajangereersimappat, isummanilu allanngortinnavianngimmagu, uanga inuttut annaasassaqannginnama, isertuussassaqannginnamalu taavalu inuit tamaavimmik raatiukkut tusaagamikku, taava sussallunga nipangersimassagama?
Oqallisilersitsinikkut suna anguiuk?
- Inuiaqatigiit ukiopassuit misigissusaat eqqorpakka.
Biskoppi matumunnga sulisoqarnermut tunngasuummat oqaaseqarumanngilaq.
Markus E. Olsenip naalagiartitsinera uani takusinnaavat.
