Maanna 700-init amerlanerusut atsiorput: Taamaammat Markus Olsen palasitut uterteqqikkusupparput

Oqaluffimmi qilaatersorneq aamma kunngeqarfiup Naalakkersuisullu naalagiartitsinermi eqqaaneqannginnerat. Palasip, Markus E. Olsenip palasitut juunip naanerani suliunnaarallarsinneqarneranut taakku pissutaapput.

Tamanna inuiattut ullorsiornermi naalagiarnerup KNR radiokkut toqqaananrtumik aallakaatinneqartup kingorna pivoq. Taanna tamatuma kingunitsianngua biskoppimit, Paneeraq Siegstadimit suliunnaarallarsinneqarpoq.

Tamanna kukkunerusoq, inuit 700-init amerlanerusut isumaqarput. Taakkulu maanna 753-iusut Markus E. Olsenip Nuummi palasitut atuutileqqinnissaanut atsiorsimapput.

Kinaassutsiminik isertuussineq atsiornernik katersinermik aallartitsivoq. ”Inuiat aatsaat pisariaqartitsileruttorput anersaakkut ataatsimoorfeqarnissamik, uanga isumaqarpunga Makkorsi atorfiminiiginnartariaqartoq”, atsiornernik katersinermi allassimavoq.

Eqeersimaartittarpaanga

Buster Berthelsen Qinngorpumeersoq atsiortut ilagaat.

- Anersaakkut eqeersittarpaanga, taamaattumik nuannaraara, Buster Berthelsen KNR-imut oqarpoq.

- Pingasoriarlunga naalagiarlunga tusarnaarpara. Aamma naalagiarnerup kingorna inunnut qungujulasarnera nuannarilluinnarpara. Palasit allat tussiutip kingulliup aallartinnerani tammartartut takunikuuvara – soorlu naalagiartitserusunngitsut. Makkorsili inunnut isigaluni qungulasarpoq, tamanna nuannaraara!

- Inuiattut ullorsiorsiornitsinni oqalugiaataa tusarnaarpara. Nuannaraara Palaseqarpugut allanut eqeersimaartitsisinnaasumik. Sooq tamanna pissutigiinnarlugu suliunnaarallarsinneqassava?

Tusarfik tutsuiginartoq naapertorlugu Markus E. Olsenip oqaluffimmi qilaatersortoqarnissaanut qinnuteqarsimannginnera naalagiartitsinermillu allannguinissamut akuersissuteqarfigineqarsimannginnera pissutigalugit suliunnaarallarsinneqarpoq.

AAMMA ATUARUK Præst fritaget for tjeneste: Menighedsrepræsentanter er splittede

Morten Nornildili inatsisileritooq oqaluffeqarnermullu immikkut ilisimasalik aperigaanni naalagiartitsinermi qilaatimik atuinissamut akuersissummik qinnuteqarnissaq pisariaqanngilaq:

- Ilagiit sinniisaannut aperisoqartariaqanngitsoq eqqarsarpunga. Naalagiarnermi aalajangersimaqqinnaartumik ataatsimi, tassalu inuiattut ullorsiornermi, palasiunermi oqaluussinermi oqaatiginiakkap paasitilluarusunnerani nammineq periuseqarsinnaanermiittoq isumaqarpunga, taanna KNR-imut juunip ulluisa aallaqqaataanni oqarpoq.

Oqaluffik taama kipparitsigissanngitsoq

Ole Dorphillu tamanna maluginiarpaa. Taanna Ilulissani borgmesteriusimavoq, taassumalu Markus E. Olsenip palasitut uterteqqinneqarnissaanut aamma atsiorpoq.

- Oqaluffiup malittarisassat kipparippallaamik nassuiarai professorip oqaatigaa, kukkunerlu annikitsuunerarlugu. Kukkunerlu annikitsoq palasimut annikinnerusumik kinguneqartitsissutaassaaq. Oqaluffik taama kipparitsigisariaqanngikkaluarpoq, Ole Dorph KNR-imut oqarpoq.

- Qilaatersorneq assortuussutaangaatsiarnani atorneqarsinnaasariaqaraluarpoq. Oqaluffimmi pissusitoqqanik suli pigiliutiinnagaqarpallaartugut isumaqarpunga, tamannali peerniarlugu sulissutigissavarput. Tassunga taarsiullugu uatsinnut aqqut eqqortoq nassaariniarlugu nukiit atussavagut, taanna oqarpoq.

AAMMA ATUARUK Ekspert om suspendering af præst: Der er tale om en mindre fejl, som bør udløse en mindre konsekvens

- Oqallittoqangaatsianngikkaluarluni ajornaatsumillu ileqqutoqqanut uatsinnut immikkuullarissut ilaannut atatillugu aaqqiissutissarsisinnaasugut isumaqarpunga.

Markus E. Olsen oqaaseqarumanngilaq.

Biskoppip suliaq inummut tunngasuunera pissutigalugu aamma oqaaseqarfigiumanngilaa.

Markus E. Olsenip naalagiartitsinera uani takusinnaavat.