Markus E. Olsen: Oqaatsit ilitsoqqussakka Folketingimi atortariaqarpakka
Markus E. Olsen Folketingimi sinniisutut septemberip 22-aniit oktoberip arfernat ilanngullugu issiasussanngorpoq.
Folketingimi ilaasortap Aki-Matilda Høegh Dammip ulluni 14-ini sulinngiffeqarnissani nalunaarutigeeraalu tamanna pisussanngorpoq.
Aki-Matilda Høegh-Dam USA-mi aqutsisunik pikkorissarnissamut peqataassasoq, nutaarsiassaqartitsivik ritzau allappoq. Pikkorissarnissaq Amerikamiut nunanut allanut ministereqarfiata aaqqissuussaraa.
Markus E. Olsen Folketingimut novembarip aallaqqaataani qinersinermi Aki-Matilda Høegh Dammip partiiani Siumumi taaguuneqarnerni tulliuvoq, taamaammallu sinniisutut Folketingimut ilasortartut piffissami tassani sulissaaq.
Kalaallisut oqalunniartoq
Markus E. Olsenilu Folketingimi oqaluttarfimmi kalaallisut oqalunniarluni oqarpoq.
- Uanga oqaatsit toqqissisimaffigisakka oqaatsit tamakkiisumik uummammiukka silassorissusera eqqarsarsinnaasuseralu malillugu oqaatsit piginnaaneqarfiginerpaasakka atorniarpakka. Qallunaatoorsinnaavunga aamma tuluttoorsinnaavunga. Tamakkiisumik sukumiisumillu isummakka oqaatsit ilitsoqqussakka atortariaqarpakka, Markus E. Olsen KNR-imut oqarpoq.
Aki-Matilda Høegh-Dam naalagaaffeqatigiinneq pillugu maajimi oqallinnermi Folketingip oqaaseqartarfianit kalaallisuinnaq oqaluppoq.
Folketingip siulittaasua pisumi Aki-Matilda Høegh-Damimut kalaallisut oqalugiareertorlu qallunaatut oqalugiaatini atuassaneraa apeqqutigaa, kisianni Aki Matilda pisumi kalaallsuinnaq akiuivoq.
Ataqqinninnini takutillugu qallunaatut aallartinniartoq
Markus E. Olsenili Folketingip oqaluttarfianiit qallunaatut nassuiaaqqaarluni kalallisut oqalussalluni oqarpoq.
- Ataqqinninnera takutissavara aamma suleqatiserinninnera takutissavara malugitillugulu oqaatsit siulliit qallunaatut oqaatiginerini. Sinnerili oqassaanga sinnerisa oqaatiginissaannut uanga nammineq toqqaserluuteqarnanga oqaatsit ilitsoqqussakka atorniarlugit, taassunakkullu taamaaliornissannut isumakkeerfigineqarnissamik noqqaassaaga, Markus E. Olsen oqarpoq.
Aki-Matilda Høegh-Damip allaffianut saaffiginnissimalluni, tassanngaanniillu kalaallisut oqalunnissamik kissaat ingerlatinneqassasoq naatsorsuutigalugu paasissutissiissutigaa.
Taassuma Folketingimi siulittaasoqarfik kalaallisut oqalunniarnerminik paasitinneqarsimanissaa aamma nammineerluni qulakkeerniarpaa.
Qoqassiinissaq allatulluunniit avissaartuutsitsinissaq saqitsaatsitsinissarluunniit siunertarinagu Markus E. Olsennip ilanngullugu erseqqissarpaa.
Markus E. Olsenip kalaallisut oqalunniarnermik kissaataa pillugu tusagaqarsimanani Folketingip allattoqarfiata KNR-imut aggustip ulluisa 18-ianni paasissutissiissutigaa.
Kalaallisut savalimmiusullu Folketinngimi oqalussinnaanneq Folketingip siulittaasoqarfiani juunimi ataatsimiissutigineqarpoq. Folketingimi nutserisoqarnermut aaqqissuussamik pilersitsisoqassappat, ikinnerpaamik 200 millionit koruuninik akeqassasoq, tassani erserpoq.
