Aki-Matilda Høegh-Dam Folketingimiit sivikitsumik sulinngiffeqalersoq
Aki-Matilda Høegh-Dam Siumut sinnerlugu Folketingimi ilaasortaq septembarip 22-aniit sapaatit akunnerni marlunni sulinngiffeqassaaq.
Sermitsiaq.ag taama allappoq.
Sulinngiffeqarnissaa pissutaalluni oktobarip pingajuanni Folketingip ammaanersiorneqarnerani Aki-Matilda Høegh-Dam peqataassanngilaq. Taarsiullugu sinniisussaq Markus E. Olsen peqataassaaq, taassuma sapaatit akunnerni marlunni sinniisuunissani Sermitsiaq.ag-imut uppernarsarpaa.
USA-mi aqutsisunik pikkorissaanissamut Aki-Matilda Høegh-Dam peqataassaaq, pikkorissaaneq Amerikamiut nunanut allanut tunngasunut ministereqarfiata aaqqissuussaraa.
Amerikamiut Nuummi aallartitaqarfiat qaaqqusinermi innersuussisuuvoq, taanna Sermitsiaq.ag-mut oqarpoq.
Siulittaasussatut sassaraluarsimasoq
26-nik ukiulik naalagaaffiillu pissusiinik sammivilimmik ilinniagaqarsimasoq, Aki-Matilda Høegh-Dam, 2019-imili Folketingimi ilaasortaavoq.
Juulimi Siumut siulittaasussaatut sassarpoq, siulittaasumilli taasinermi Erik Jensen siulittaasunngoqqilluni ajugaavoq.
Aki-Matilda Høegh-Dam Folketingimi arlaleriarluni malunnaateqarsimavoq. Ilaatigut oqaatsinik allanik atuineq pillugu Folketingip ataatsimiittarfiani oqallinneq tupigusuutigineqaqisumik kalaallisut oqalugiarluni ammarpaa.
Taamani Folketingimi ilaasortat arlallit isornartorsiuipput. Tamannali Folketingimi siulittaasoqarfiup Folketingip ataatsimiittarfianit toqqaannartumik oqaluttaasoqartalissanersoq oqaluuserineqarnissaanut aalajangiineranik kinguneqartitsisimavoq. Oqaluttaasoqartarnissarli akisuallaartussatut nalilerneqarpoq, aaqqiissullu alla ujarneqassaaq.
