Manuminap arfinilinnik ukiullip Dronning Ingridip napparsimaviani neqaajartereerluni toquneranit qaammatit qulingiluat qaangiussimaleraluartut, pisoq ippassaq pisimasutut ilaqutaanut misinnarpoq. 

Pisorlu paasiuminaaqisoq taassuma angutaa Frederik Olsen oqaluttuarpoq: 

- Upperinngilarput, toqunera uppererusunngilarput. Pinnguai atisaalu suli pigaagut. Piiarnissaat iginnissaalluunniit saperparput, oqarpoq nangillunilu: 

- Suli malugisarparput, kingunerlutitsivugut. Unnuakkut sinnarluttarpugut eqqarsaatillu ingerlaaginnalertarlutik. Qanoq ililluni taama ajortigisumik pisoqarsinnaaneranik apeqqutit suli maannamut akissutisinngilagut. 

Manumina neqaajartiinnartussaagaluarpoq suliaritinnissaalu nalinginnaasuugaluarpoq, nakorsarli aalajangerpoq Manuminap sorlunmigut naaneri ilanngullugit peerniarlugit. 

Angajoqqaavi akuersitinneqanngitsut.

Paniat suliaritereerluni ullualuit qaangiunneranni aammik merialermat, angajoqqaavi Frederik Olsen aamma Justine Eipe napparsimavimmut attaveqaraangamik soqutiginngitsuusaarneqartarput. Ullullu sisamat qaangiummata Manumina toquvoq. 

Nakorsaaneq politiinit aggersarneqarpoq

Ilaqutaasut apeqqutimi akineqarnissaanik amigaateqarput utaqqikatallutillu, allalli aamma taama misigipput.  

Frederik Olsenip oqarnera naapertorlugu, politiit aasarli suliamik misissuisut sooq suliami suli aalajangertoqarsimannginnera paasiniarlugu nakorsaaneq ataatsimeeqatiseralugu aggersarsimagaluarpaat, Manuminap suna toqussitgisimaneraa paasiniarlugu. 

- Pisoqartariaqalerneranik oqariartuuteqarlutik politiit sianerfigaannga. Nakorsaaneq nukingisaarniarlugu oqarput, Frederik Olsen oqarpoq nangillunilu 

- Kingornalu nakorsaaneq politiinit ataatsimeeqatigineqarsimavoq, politiillu naapertorlugit nakorsaanerup Napparsimasut Maalaarutaanik Aalajangiisartunit akissuteqartoqarnissaa utaqqivaa, Frederik Olsen oqaluttuarpoq. 

Napparsimasut Maalaarutaanik Aalajangiisartut peqqinnissaqarfimmut attuumassuteqaratik aalajangiisarput, inuinnarnik marlunnik peqqinnissaqarfimmilu ilinniarsimasunik marlunnik ilaasoqartarput dommerimillu siulittaasoqarlutik.

Politiit misissuinertik naammassereerugu Nunatsinni Nakorsaaneqarfiup suliami aalajangiinissaa kisiat utaqqigaat, Frederik Olsenip oqaatigaa: 

- Politiit misissuinerminni naammassereersimasut paasivarput. Politiillu nakorsap naliliineranik nakorsaaneqarfimmit tunniussisoqarnissaa kisiat amigaatigalugu paasitippaatigut. Kisianni tassa Manuminap toquneranit qaammatit qulingiluat ingerlareerneranni apeqquterput suli akineqanngila, qanoq ililluni taama pisoqarsinnaava?

Nakorsaaneqarfik akilertornissamik neriorsuigaluarpoq

2023-mi aasakkut Manuminap toquneranit ullualuit qaangiummata angajoqqaavi nakorsaaneqarfimmut ornigullutik maalaarumminnik tunniussimmata, akineqalertornissaanik nakorsaaneq neriorsuigaluarpoq:  

- Nukinginnartutut suliarineqarnissaanik neriorsorpaatigut. Sukkanerpaamik uterfigissalluta nassuiaammillu tunissalluta oqarpoq, maannali qaammatit qulingiluat ingerlareerneranni sunnguamilluuniit  tigusaqanngilagut, Frederik Olsen oqarpoq nangillunilu: 

- Suliap politiinut tunniunneraniit nakorsaanermut maalaaruteqarnitsinnut sumilluunniit akissutisinngilagut. 

Tuppallersaalli suunngikkaluaqisoq Manuminap ilaqutaasa qaangiiniarnerminni iluaqutigissavaat. Tassa qanoq taama ajortigisumik pisoqarneranut pissutaasup paasinissaa. Paasinngikkunikku ingerlaqqissinnaanngitsutut misiginertik pillugu Frederik Olsen ima oqaluttuarpoq: 

- Suliami uani aalajangiisoqanngippat sorsuuteqarnerput ingerlatiinnartariaqassavarput. Qaammatit qulingiluat ingerlareerneranni suli allangortoqarsimannginnera upperisinnaanngilara, Frederik Olsen oqarpoq. 

- Qaanginngisaannassavarput. Panipput uterteqqissinnaanngilarput, kisianni suliami aalajangiisoqarpat toqussutaalu paasineqarpat immaqa taava aliasunnerput inuunerpullu ingerlateqqissinnaassavagut.

Politiit nakorsaaneqarfillu suliaq pillugu oqaaseqarumanngillat.