Mobilepay kalaallisut saqqummilersoq
Mobilepay-appi ataasinngornermi nutarterneqarnissaa pilersaarutaavoq.
Kalaallisut siunissami atorneqarsinnaaniassammat ataasinngornermi nutarterneqassaaq.
Rune Birkemose Volsgaard Jakobsen, Mobilepayimi ineriartortitsinermi pisortaq, taama oqarpoq
- Appiutitta nunat niuerfigisatta oqaasii atorlugit neqeroorutigisinnaagatsigu tamanna tulluusimaarutigaarput.
Normut nunatsinneersut
Mobilepay nunatsinni 2020-mi atulersinneqarpoq. Atuisut Tusassikkut tassunga tunngatillugu danskit normuannik normutaarsinnaanngorput.
Oqarasuaatip normui arfinilinnik kisitsisitallit nunatsinneersut, +299-mik nunap kodeanik aallartittut, appikkut maannamit atorneqarsinnaanngussapput.
Tamanna pissutigalugu Tusassip normuutai danskit kingusinnerusukkut atorunnaarsikkiartuaarneqassasut Tusassimit paasissutissiissutigineqarpoq.
Taamaattumik Mobilepayimi oqarasuaatip normua nunatsinneersup piaartumik atorneqalernissaa Tusassimit kajumissaarutigineqarpoq.
Nuummit Palermomut
Appi Grønlandsbanki taakkualu nutserisui suleqatigalugit ineriartortinneqartoq ineriartortitsinermi pisortap oqaluttuaraa.
- Ataatsimoorluta pitsaasumik suliaqarnerput qujamasuutigeqaarput, Rune Birkemose Volsgaard Jakobsen oqarpoq.
Mobilepayip appi Europami appinut allanut nassiussisinnaanngortikkumallugu aamma ineriartortileruttorpaat.
- 'Nuummit Palermomut' taaguusikkatsinnik erseqqissumik anguniagaqarpugut. Sumiikkaluaraanniluunniit kiffartuussivimmik nunagisameersutut misinnartumik ineriartortitserusuppugut, Rune Birkemose Volsgaard Jakobsen oqarpoq.
