Politiit ullormut nalunaarutaat: Nakuusernerit arlallit pinngitsaaliinerlu ataaseq nalunaarutigineqartut

Nakuusertoqarneranik nalunaarutit ulloq unnuarlu kingulleq 'malunnaatilimmik amerlanerat', sillimasup pisortaata ataasinngornermi ullaakkut oqaatigaa. Nakuusertoqarneranik nalunaarutiginninnerit tallimaanerat pinngitsaaliisoqarsimaneranillu nalunaarutiginninnerup ataasiunera, politiit paasissutissiissutigaat.

Allattoq Nicole Sander Bertelsen

marsip 09-at 2026 08:45

Nutserisoq Medea Olsen

Qaqortumi innuttaasup pinngitsaalineqarluni arneriffigineqarsimanini sapaammi ullaakkut nalunaarutigaa. Nalunaarut nalunaaqutaq 07:41 tiguneqarpoq.

- Taamaattumik politiit sumiiffimmut ornigupput misissuillutillu, suliarlu maanna misissoqqissaarneqarpoq, sillimasut pisortaat Aputsiaq Hansen oqaluttuarpoq.

Angut inersimasoq tigusarineqariarluni unnerluutigineqartoq kingornalu iperagaasoq, taassumap oqaluttuaraa.

Nakuusernerit malunnaatilimmik amerlassuseqartut

Aammattaaq nakuusertoqarneranik illoqarfinnit pingasunit tallimariarluni nalunaaruteqartoqarsimanera sillimasut pisortaata maluginiarpaa. Suliallu tamarmik politiinit misissorneqarput.

Pisut pingasut Ilulissani pipput, taakkualu marluk najukkami ataatsimi piffissamilu aalajangersimasumi pipput, sillimasut pisortaat oqaluttuarpoq.

- Aamma pinerliisoq ataasiuvoq, pinerlineqartulli marluupput, sillimasut pisortaat oqaluttuarpoq.

Pisimasullu allat marluk Paamiuni Sisimiunilu pipput. Sisimiuni meeraq pisiniarfimmi sulisunik qitseraallunilu isimmittaavoq, Paamiunilu meeraq angerlarami nakuuserfigineqarsimanerminik oqaluttuarpoq.

- Suliat taakkua marluk politiinit aamma misissorneqarput, Aputsiaq Hansen oqaluttuarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.