Kommunip ilaqutariit pissaaleqisut Tasiilamiittut allatut iliuuseqarfigisinnaanngikkai
Jeremias Nuko Tasiilami pisiniarfimmi akunnattooqqavoq. Nangersissava imaluunniit ilaquttaminut nerisassarsissava. Nerisassaasariaqassapput, aningaasarnimmi pissarseqqinnissaminut nerisassat ullunut 14-inut naammannavianngitsut naatsorsorsinnaavai.
Akunnattoortarnerlu taanna sivisunerusumik suli atugarisinnaavaa.
Taannami Tasiilami suliffissarsiortorpassuarnut suliffissaqanngitsunut aningaasassaqanngitsunullu ilaavoq.
Ilaqutariit kommunimit isumaginninnikkut ikiorsiissutinik annertunerusunik piumasaqaraluarput, tamannali suliffeqarnermut isumaginninnermullu ataatsimiititaliami siulittaasup, Inge Olsvig Brandt Inuit Ataqatigiinneersup itigartitsissutigaa.
Tasiilami isumaginninnikkut ikiorsiissutit qaffassinnissaannut pilersaaruteqarpa?
- Naamik. Pilersaaruteqanngilaq, taanna Qanoruumut oqarpoq.
AAMMA ATUARUK Tasiilaq suliffissaaleqiffiusoq: Meeqqagut kaallutik innartarput
Steven Arnfjord Ilisimatusarfimmi lektoriuvoq. Taassuma ilaqutariinnut 3.000 koruunit isumaginninnikkut ikiorsiissutit appasittorujussuusut KNR-imut ataasinngormat oqaatigaa.
Agguaqatigiissillugu isertitat
Tasiilami inuit 1.985-it najugaqarput.
Taakkunanga 11 procentit suliffissaqanngillat.
Agguaqatigiissillugu isertitat ukiumut 179.000 koruuniupput.
Nuummi agguaqatigiissillugu isertitat 332.000 koruuniupput.
Tasiilamimi nerisassat nioqqutissallu allat akisoorujussuupput. Kommunilli Tasiilami isumaginninnermi ikiorsissutit qaffannianngilai – taamaaliortoqarpammi assigiinngisitsisoqassasoq, Inge Olsvig Brandt isumaqarpoq.
- Ikiorsiissutit tunniunneqartartut takstbladit malillugit tunniunneqartarput, tassa kommuneqarfitta iluaniittut tassa Nuuk, Paamiut Tasiilaq Ittoqqortoormiullu innuttaasut assigiimmik pineqartussaapput.
Suliffissanik pilersisoqassanngitsoq
Steven Arnfjordip Tasiilami akileraarutip apparneqarsinnaanera periarfissatut allatut siunnersuutigaa. Taamaalilluni soorlu Nuummi inuit isertitaqarfiginerusaanni qaffanneqarsinnaavoq – Tasiilamilu inuit aningaasassaqarnerulersinneqarlutik.
Tamannali Inge Olsvig Brandip itigartitsissutigaa.
- Naamik assigiinngisitsisoqarsinnaanngilaq, taanna Qanoruumut oqarpoq.
Tasiilaq suliffissaaleqiffiuvoq.
Tasiilami innuttaasut aningaasaatikinnerulersimapput
Tasiilami innuttaasut agguaqatigiissillugit isertitaat 2019-imi ukiup siulianut sanilliullugu 2 procentimik appariarput.
Nanortalimmi tamanna aamma 2 procentimik appariarpoq.
Nunatsinni sumiiffinni taakkununa marluinnarni innuttaasut agguaqatigiissillugu isertitaat appariarpoq. Nunap sinnerani isertitat qaffakkiartorput.
Paasissutissarsiffik: Nunatta Naatsorsueqqissaartarfia
Tasiilami suliffissaaleqisutut nalunaarsorsimasut 227-upput. Suliffissaaleqisut siorna piffissamut tassunga sanilliukkaanni 99-inik amerleriarsimapput. Siornami septembarimi suliffissaaleqisut 128-upput.
Kommuneqarfik Sermersoorli ajornartorsiummut tassunga iliuuseqarsinnaanngitsoq, Inge Olsvig Brandt oqarpoq.
- Kommuni suliffissanik pilersitsisinnaanngilaq – kisianni suliffissaaleqisunut iliuuseqarsinnaavoq, taanna oqarpoq.
Ataatsimiititaliaq Tasiilami suliffissaaleqinerup ajornartorsiutaaneranik sammisaqarluni tallimanngornermi ataatsimiinnermini allappoq.
- Suliffeqarnermut Isumaginninnermullu Ingerlatsivimmit inuussutissarsiortunik suleqateqarneq siuarsarneqarpoq, tamannalu pillugu Kommuneqarfik Sermersuumi illoqarfinni tamani suliffeqarfiit minnerit angisuullu ataatsimeeqatigineqassapput.
- Suliffeqarnermut Isumaginninnermullu Ingerlatsivimmit naatsorsuutigineqarpoq, inuussutissarsiortunik suleqateqarnikkut suliffissaaleqisunik innersuussinissamut kiisalu piginnaanngorsaaqqinnermut ilinniarfissanillu ujartuisarnermut atatillugu periarfissat pitsaanerulissasut, tamannami illoqarfinni suliffissaaleqisoqarnerusumi immikkut unamminarsinnaasarpoq, tassani allassimavoq.