Tasiilaq suliffissaaleqiffiusoq: Meeqqagut kaallutik innartarput
Jeremias Nuko Tasiilami pisiniarfimmi akunnattooqqavoq. Nangersissava imaluunniit nerisassat?
- Ajoraluartumik nerisassagut naammanngimmata nanginik poortanik ataasiinnarnik pisivunga. Taakku nangit pisiakka ullunut 14-inut naammannavianngillat.
Jeremias Nuko 41-nik ukioqartoq aappanilu Tasiilamiuupput. Aappartiit qulinik qaammatilimmik paneqarput tallimanillu ukiulimmik erneqarlutik.
Piffissami maannakkut ilungersunartorsiorlutik, taanna oqarpoq.
Jeremias Nuko aappanilu kommunimit ikiorsiissutinik oktobarip ulluisa 26-anni pipput, tullissaanilu novembarip qulingiluaanni pissarseqqissapput. Jeremiasn Nukolli aningaasat sapaatit akunnerinut tulliuttunut marlunnut naammannavianngitsut takusinnaalereerpaa.
Tasiilami innuttaasut aningaasaatikinnerulersimapput
Tasiilami innuttaasut agguaqatigiissillugit isertitaat 2019-imi ukiup siulianut sanilliullugu 2 procentimik appariarput.
Nanortalimmi tamanna aamma 2 procentimik appariarpoq.
Nunatsinni sumiiffinni taakkununa marluinnarni innuttaasut agguaqatigiissillugu isertitaat appariarpoq. Nunap sinnerani isertitat qaffakkiartorput.
Paasissutissarsiffik: Nunatta Naatsorsueqqissaartarfia
- Kaalluta innartarpugut. Suutaarukkatta. Taakku aningaasat nerisassagullu nungukkaangata. Imaluunniit sipaartariaqaraangatta taamaattarpugut. Ajoraluartumik taamaattarpugut, Jeremias Nuko oqarpoq.
3.000 koruunit naammanngitsut
Ataatsimoorlutik kommunimiit ullut 14-ikkaarlugit ataatsimut 3.000 koruuninik ikiorsiissuteqarfigineqartarput.
Aappariit suliffeqanngillat. Kisianni illumut, innaallagiamut, imermut kiassarnermullu kommuninik akiliutitinneqartarput.
Jeremias Nukolu ajornartoorfimmini ikinngumminut aningaasanik atorsinnaasarpoq
- 300 koruunimik annerpaamik atorniartarpara. Taarsiiniaraangama 200 koruunimik qaavatigut ilasarpara. Taava 500 koruuni taarseqqammerpara.
Aappariit 3.000 koruunit naammanngitsut isumaqarput, ingammik Tasiilami nerisassat Nuummiit akisunerummata.
Assi: Jeremias Nuko
Jeremias Nukop aappanilu imigassartortuunatik oqaatigaa, namminerli pujortartarpoq.
Pujortassaarniarsarigaluarpoq, piffissamili uippakajaarfimmi ajornakusoortoq, taanna isumaqarpoq.
Nerisassat nangillu saniatigut kigutinut qaqorsaatit, quligutit oqarasuaammullu internetsilimmut qaammammut 350 koruunit missaannik aamma akiliisarput.
Silalu nillertikkiartuinnarpoq. Taamaammat meeqqat aamma oqortunik atisaqartariaqarput.
- Nerisassat akisoorujussuupput maani Tasiilami. Unamminarpoq tamaani inuulluni.
Taassuma ilaqutariittut atukkatik kommunimut nassuiaatiginiarsimagaluarpai, kommunili iliuuseqarsinnaanani akissuteqarpoq. Tamannalu Jeremias Nukop nukillalaarnarnerarpaa.
- Ikiorneqassagaluarutta, taava aningaasat pisartakkagut qaffanneqalaarsinnaagunik iluarsissagaluarpoq. Pisiagut naammattalissagaluarput.
- Suliffippassuarnik pilersitsisoqaraluaruni aamma iluassagaluarpoq. Ataavartumik sulisinnaalluni iluassagaluarpoq. Suliffittaassagaluaruma sulissagaluarpunga, kørekort-eqarpunga, taanna atorlugu sulerusussinnaagaluarpunga.
Suliffissarsiniarneq ajornartoq
Jeremias Nuko Tasiilami suliffissarsiortorpassuit ilagaat.
Nunatsinni naatsorsueqqissaartarfik naapertorlugu Tasiilami suliffissaaleqisut 227-upput. Suliffissaaleqisut siorna septembarimi 128-upput.
Naatsorsueqqissaartarfimmit kisitsisit naapertorlugit Tasiilami innuttaasut 1.985-iupput. Tassa innuttaasunit 11 procentit suliffissaaleqisuupput.
Nuummi suliffissaaleqisut procentinngorlugit 1,5 procentiupput.
Jeremias Nuko suliffissarsineq ajuleqqavoq, suliffissatulli periarfissat ikippallaarsoralugit.
- Maani Tunumi periarfissat annikittuaraapput. Tasiilaaq soorlu ulikkaaqqasoq, Jeremias Nuko oqarpoq.
