Ilisimasatooq: Kommunit atugarissaaneq sunaanersoq oqaasinngortittariaqarpaat
Kommunit ikiorneqarnissaminnik kissaataat piviusunngortinneqassappat Danmarkimiit sulisut 65-it tikissapput,. taakkualu tassaassapput tarnip pissusaanik ilisimatuut, perorsaasut, inuunerissaasut isumaginninnermilu siunnersorterpassuit. Taakkualu suliassarpassuit isumaginissaannut ikiuutikutsuussasut, Ilisimatusarfimmi inuiaqatigiilerisoq ilisimatoorlu Steven Arnfjord isumaqarpoq.
- Oqartamiatagooq kommunini suliartortussat kommunit ataasiakkaat suliaannik ikioriartornissaannut piareersarluarsimapput, taava kommuninut ataasiakkaanut iluaqutaassaqaat. Kisianni sunaluunniit piffissaqarfiusariaqarpoq. Sulisummi maani sulianik aaqqissuusseriaatsimut sungiussiniaqqaartariaqarput.
AAMMA ATUARUK Nunatsinni kommunit isumaginninnikkut suliassaannik danskit ikiuussinnaapput
Ilinniartitsilluaqqaartoqartariaqarpoq
Tassami inooriaatsikkut oqaatsitigullu assigiinngissutit saniatigut sulisut atugarissaarnissamut aaqqissuussinerit nunarsuarmi isumannaallisitsinerpaat ilaanneersuupput. Soorunami uparuagassartaqanngitsuunngilaq, aaqqissuussinerli ukiuni hunnorujulinni misilittagaqarfiusoq, Steven Arnfjord nassuiaavoq. Taamaammat qularutissaanngilaq suliartorlutik tikittussat qanoq suleriaaseqassanerlutik pingaartitallu suut tunaartaralugit sulissanerlutik apersuiumaarnissaat.
Kommunimiillu akissutissat nalunarsinnaasut Arnfjord isumaqarpoq.
- Atugarissaarneq sunaagami, immikkut ilisimatooq aperivoq?
- Tassami nunarsuarmik pikkorinnerpaanik sulisoqaraluaraanniluunniit, inuiaqatigiit qanoq ittut innuttaasunut pilersinniarlugit oqaasertalersoqqaanngikkaanni, kommunini isumaginninnikkut ajornartorsiutit iluarsineqarsinnaanngillat.
Innuttaasut ajunngitsumik atugaqaqqullugit atugarissaarnikkut atortulersuuteqarnerusariaqartugut, politikerit amerlanersaat oqaluttarnerat, oqarluartaarnerinnaasoq, ilisimasalik isumaqarpoq
- Aap, atugarissaarnermi suugami. Inuuneq pitsaasoq maani qanoq oqaasertaqartipparput?
tamatumani isumaginninnermi iliuusissatut pilersaarut sulisut ataatsimik siunnerfeqarnissaannut iluaqutaassasoq. Ilisimatooq isumaqarpoq.
- taama ittoq tassaavoq naalakkersuinikkut sakkoq, kommunini sulinermi periusissanngorsinnaasoq, Arnfjord oqarpoq.
AAMMA ATUARUK Kommunit Danmarkimut sulisunik, inissanik ilinniarsimasunillu ikioqqusut
Steven Arnfjord isumaqarpoq kommunit iliuusissatut pilersaarummik nittartakkaminnut ikkussisariaqartut. Taamaaliornikkut innuttaasut sulisullumi sumut ingerlassanerlutik nalornissutiginnginneruniassammassuk.
Tunuliaqut
Kommunini tallimaasuni sisamat meeqqanut inuusuttunullu isumaginninnikkut avataaniit ikiorneqarnissaannik kissaatinik tunniussisimalerput. Tasiilami inuuniarnikkut ajornartorsiuteqartunut tunngassuteqartoq piviusulersaarut maajimi takutinneqareersorlu nunatsinni isumaginninnikut ajornartorsiorneq oqallisaalerpoq.
Meeqqat inuusuttullu atugarissaarnerunissaat anguniarlugu taamaammat Inatsisartut Naalakkersuisut ikiorneqarnissamik Danmarkimut kissaateqaqquaat. Kissaatigineqartulli amerlapput, ilaatigut suliffeqarfiit nutaat, sulisut ilinniagaqartut amerlanerusut, sulisut oqartussanut suleqatiginninnerusut Kiisalu peqqinnerulernissamut pinaveersaartitsinermullu sulinermi ikiorneqarnissamik kissaateqarluni.
