Maajip qaammataa ukiuni 39-ni aatsaat taama kiatsigisoq
Nunarsuaq kiassutsitigut rekordiliiffioqqippoq.
Nunarsuup qaammatip siuliani agguaqatigiissillugu kiassusia EU-mi sullissiviit ilaannit Copernicusimit uuttortarneqarmat, ukiuni 40-ngajanni aatsaat taama kiatsigisoq paasineqarpoq.
Ilisimatuut tallimanngormat taama nalunaaruteqarput.
1981-imit taama uuttortaasoqartalermalli aatsaat taama kiatsigaaq.
Immat kissarnerunerat pissutigalugu nunami kiannerunissaa naatsorsuutigineqartoq, silasiortut nunarsuaq tamakkerlugu suliniaqatigiiffiat (WMO) qaammatip siuliani nalunaarpoq.
Ingammik Alaskami, Sikuiuitsumi kujallermi Siberiallu ilaani nalinginnaasumit kianneruvoq.
Taakkunani agguaqatigiissillugu gradinik qulit angullugit nalinginnaasumit kiannerusoq, Copernicus Climate Change Servicep (C3S) kisitsisaataasa takutippaat.
/ritzau/dpa
