Múte isumaqatigiissut pillugu: Misilittakkat ilikkagaqarfigineqarsimanngillat

Danmarkip piginneqataassuteqarneranit misilittakkat ilikkagaqarfigineqarsimarpasinngitsut Kalaallit Airports pillugu piginneqataanissamik isumaqatigiissummit takuneqarsinnaavoq. Inuit Ataqatigiit siulittaasuat, Múte Bourup Egede taama isumaqarpoq.

- Uani naalagaaffimmik isumaqatigiissuteqarnermi takusinnaavarput, ilaatigut misilittakkat taakku ilinniarfigivallaarnagit naalagaaffik Kalaallit Airportsimut annertuumik aalajangeeqataasinnaasutut inissisimalertussaasoq, Múte Bourup Egede oqarpoq.

AAMMA ATUARUK Kalaallit Airports pillugu piginneqatigiinnissamik isumaqatigiissut saqqummiunneqartoq

AAMMA ATUARUK Pakatsinartorujussuuvoq

Ingammik Danmarkip itigartitsisinnaatitaanissaa iluarinngilaa, Air Greenlandilu Danmarkimit piginneqataaffigineqartoq assersuutigalugu.

Inuit Ataqatigiit Air Greenlandip allanit piginneqataaffigineqarnera siusinnerusukkut isornartorsiorpaat. Partii naapertorlugu aalajangiisoqassatillugu timmisartortitseqatigiiffimmut piginneqataasut marluk allat, tassalu SAS naalagaaffillu, namminneq soqutigisatik aallunnerusarpaat. Tamatumalu nunatsinnit kissaatigisat piviusunngortinnissaat ajornarnerutittarpaa.

- Misilittakkagut imaapput, assersuutigiinnavillugu Air Greenlandimi ineriartortitsinissamik siunnerfeqarnermi piginneqataasunit unikaallatsitsisinnaasarneq. Taanna arlaleriarlugu misilittagaqarfigineqarpoq. Ilaatigullu tassa taannaavoq massakkut misigisarput, helikopterinik immaqa ullutsinnut naapertuukkunnaavissimasunik atuineq, Múte Bourup Egede oqarpoq.

AAMMA ATUARUK Air Greenland skal ejes helt af Grønland

Amerlanerussuteqartulli isumaqatigiissut taperserpaat. Inuit Ataqatigiillu amerlanerussuteqartut aalajangigaat tusaatissatut tigugaat, Múte Bourup Egede oqarpoq, partiillu illuatungiliuttup suleqataanissaa neriorsuutigalugu.

- Uagut inuiaat kalaallit aammalu nunarput illersorlugu, aningaasanillu aamma taama annertutigisunik siunissamut aningaasaliinertut taaneqarsinnaasunik suliaqarnerup illersorneqarnerpaajusinnaasumik suliarineqarnissaa uagut qulakkeerinniffigissallugu suleqataaffigissavarput, Inuit Ataqatigiit siulittaasuat Múte Bourup Egede oqarpoq.

AAMMA ATUARUK Kim Kielsen naammagisimaarinnittoq: Nunatsinni nuannaarutigisariaqarparput