Kim Kielsen naammagisimaarinnittoq: Nunatsinni nuannaarutigisariaqarparput
- Isumaqarpunga nunatsinni nuannaarutigisariaqaripput isumaqatigiissut taama angusaqarfiutigisoq, taanna atorluassagipput. Nunattalu attaveqaatitigut ineriartortinnissaanut periarfissatsialak massakkut pissarsiarisarput atorluartariaqaripput, Kim Kielsen ministeriuneq Lars Løkke Rasmussen aamma Kalaallit Airports Holdningimi siulersuisuni siulittaasoq Johannus Egholm Hansen atsioqatigereerlugit KNR-imut taama oqarpoq.
Isumaqatigiissuteqartoqarnermi Kalaallit Airports International, Nuummi Ilulissani mittarfinnik tallilerinermik suliaqartussaq, naalagaaffiup 33,3 proncetinik piginneqataaffigilerpaa.
AAMMA ATUARUK Danmarkip mittarfiliassanut aningaasaleeqataanissaa inaarutaasumik atsioqatigiissutigineqartoq
Danskit naalagaaffiata mittarfiliortiternermik suliniutinut peqataaneratigut aningaasalersuinissamik naatsorsuutigisamit akikinnerulersitsinera Kim Kielsenip immikkut maluginiarpaa.
Danmarkip Nunatsinni mittarfinnut aningaasaliinera
- * Naalagaaffik Nuummi Ilulissanilu mittarfinnut 700 mio. koruuninik aningaasaliivoq. Naalagaaffiup taamaalilluni mittarfiit marluk 33,3 procentimik piginneqataaffigisinnaalerpai
- * Den Nordiske Investeringsbankimit 450 mio. koruuninik atorniartoqarpoq, naalagaaffillu atornermut qularnaveeqqusiisuuvoq, taamaalilluni atukkanit erniat appasissinnaallutik.
- * Naalagaaffik aningaasaliissutinik pisariaqartitat sinnerinut 450 millionit koruuninik erniakitsumik taarsigassarsisitsissaaq.
- * Naalakkersuisut Naalagaaffillu 220 mio. koruuninik sanitigut aningaasaliipput, taakku Nunatsinni inuussutissarsiornerup ineriartortinneranut atorneqassapput.
- Soorunami nuannaarutigivara naalagaaffiup tassani peqataalernera, aamma aningaasaliinera. Soorunami suliassamik tamakkiisumik isigissagaanni, aningaasat avataaninngaanniit atugassavut, ernianut akilersugassavut, allarpassuillu eqqarsaatigalugit appariarujussuarput. Aamma akilersuinissarput ukiorpassuarnik annikillisinneqarpoq, Kim Kielsen oqarpoq.
Inuit Ataqatigiinnit Partii Naleqqamillu isornartorsiorneqartoq
Kim Kielsenip ministeriunermut isumaqatigiissuteqarnera pingaartumik Inuit Ataqatigiinnit Partii Naleqqamiillu isornartorsiorneqarpoq, taakku isumaqaramik piginneqatigiinnissamik isumaqatigiissutikkut siunniunneqartukkut Danmark oqaasissaqartitaavallaalissasoq.
Naalakkersuisullu siulittaasuat tamatumunnga oqaatigaa Danmarkip ikinnerussuteqarluni aktiaatilittut oqaasissaqartitaanera minnerpaaffimmiittoq. Aamma isumaqatigiissummi atugassarititaasut ingerlatseqatigiiffiit allat ikinnerussuteqarlutik piginneqataalersimassagaluarpata aamma taamaassimassagaluartoq:
- Uagut aningaasaliinerput annertunerujussuuvoq, taamaammat aamma tassani oqartussaaneq taamatorluinnaq annertuneruvoq. Suliassanik ataasiakkaanik naaperiuseqarpugut, qanoq sukkullu saqitsaattoqassagaluarpat, qanoq iliortoqarsinnaaneranik, Naalakkersuisut siulittaasuat oqarpoq.
Taamaammat Kim Kielsenip naalakkersuisoqatigiinni partiimilu tapertaasumi Demokraatini ajornartorsiuteqassangatinngilaa:
- Uani Inatsisartut aalajangernikuuaat ukiarmi, naqissuseqqillugulu, taanna suliaq aallaavigalugu uanga Naalakkersuisut siulittaasuattut suliaq ingerlannikuuara.
