Partii Naleraq: Pakatsinartorujussuuvoq
- Kalaallit Nunaat sinnerlugu piginnittussaagaluarluta oqartussaaffeerunnerput tassuuna ersersinneqarmat, Danmarkip Kalaallit Airports Internationalimik piginneqataanissaa pillugu isumaqatigiissut saqqummiunneqareersorlu Pele Broberg Partii Naleqqameersoq KNR-imut oqarpoq.
Partii Naleraq mittarfiliortiternissaq pillugu aallaqqaataaniilli akerliusuuvoq, tamannalu pillugu septemberimi 2018-imi naalakkersuisooqataajunnaarluni.
Danmarkip Kalaallit Airports Internationalimik piginneqataanissaa pillugu isumaqatigiissut Kim Kielsenip sapaatit akunnerata siuliani atsiorpaa.
* Naalagaaffik Nuummi Ilulissanilu mittarfinnut 700 mio. koruuninik aningaasaliivoq. Naalagaaffiup taamaalilluni mittarfiit marluk 33,3 procentimik piginneqataaffigisinnaalerpai
* Den Nordiske Investeringsbankimit 450 mio. koruuninik atorniartoqarpoq, naalagaaffillu atornermut qularnaveeqqusiisuuvoq, taamaalilluni atukkanit erniat appasissinnaallutik.
* Naalagaaffik aningaasaliissutinik pisariaqartitat sinnerinut 450 millionit koruuninik erniakitsumik taarsigassarsisitsissaaq.
* Naalakkersuisut Naalagaaffillu 220 mio. koruuninik sanitigut aningaasaliipput, taakku Nunatsinni inuussutissarsiornerup ineriartortinneranut atorneqassapput.
Tamannalu Brobergimit isornartorsiorneqangaatsiarpoq:
- Pakatsinartorujussuuvoq taama niuernerlutsigisutut inissinnikuummata Naalakkersuisut taavalu tapertat partiiat Demokraatit.
Itigartitsisinnaaneq akerleraat
Kalaallit Airports Internationalip siulersuisuini naalagaaffiup itigartitsisinnaanera Partii Naleqqap akerleraa. Soorlu siulersuisunik qinersinermi kiisalu pingaarutilinnik allanngortiterisoqarnermi.
- Danmark ineriartortitsinissanut tamanut itigartitsisinnaappat,
taava kalaallit suliniutaattut taassallugu pisariaqanngitsoq isumaqarpunga, Pele Broberg oqarpoq.
Piginneqatigiiffik Nuummi Ilulissanilu mittarfinnik ingerlatsisussaq pillugu pingaarutilinnik aalajangiisoqassatillugu nunarput Danmarkilu isumaqatigiittassappata, tamanna periuseq nalinginnaasuusoq ilisimasallit arlallit KNR-imut oqaatigereerpaat.
Danmark aningaasaliingaatsiartussaammat naalagaaffiup pisinnatitaaffeqarnissaa pissusissamisoortuusoq, ilisimasalinnit nalilerneqarpoq.
Danmarkip Kalaallit Airports Internationalimi aningaasaliissutiminik qularnaarinniinnarsimanera, Pele Brobergip paasilluarsinaavaa, Kalaallilli Nunaata piginneqatigiiffimmut tamakkiisumik oqartussaanini annaammagu ugguarluni.
