Lotte kulturikkut kingornussaminik tammatsaaleerusullunilu Tunu pillugu pigiliutiinnakkanik isumaqartitsisarunnaarusuttoq
Kuummiormiup, Lotte Maré Christensenip, aanami oqaluttuatoqqanik oqaluttuartoq peroriartornermi ilitsoqqussaraa.
Lottep aanaavata angajoqqaamik oqaluttuatoqai oqaluttuareqqittarpai. Tassa oqaluasaarani oqaluttuatoqqanik oqaluttuartarpoq, oqaluttuatoqqallu taakku ileqqorissaarnermut, ataqatigiinnermut anersaamullu tunngasuupput.
Lotte Maré Christensenillu tunumiut oqaluttuatoqaat pillugit atuakkiaminik pingasuusunik saqqummersitsisussanngorpoq. Atuakkiaalu kitaamiunit aamma atuarneqarsinnaaqqullugit kitaamiusoorput. Tunulu pillugu pigiliutiinnakkanik isumaqartarunnaartitsinissi siunertaralugu, Lottep taakku atuakkiarai.
- Oqaluttuatoqqat taakku kinguaariit tulliinut ingerlateqqinnissaat pingaarteqaraa, taamaaliunngikkuttami oqaluttuatoqqat taakkua nuanneqisut puigorneqassammata, Lotte Maré Christensen oqarpoq.
KNR-radiomi atuaasutut sulitilluni atuakkiorusulersimavoq. Taassumalu tunumiut oqaluttuatoqaannik oqaluttuartunik immiussatoqqat KNR-ip toqqorsivianeersut tusarnaallattaalersimavai.
Immiussatoqqat tusarnaallattaarnerini meeraanermini misigisani nuannersut eqqaallattaaleriaramigit, tunumiut oqaluttuatoqaasa ilaat kitaamiusuunngortippai. Taakkualu qitornaminut kitaamiusuinnaq oqalullutillu paasisinnaasunut oqaluttuareqqissinnaarusullugit aaqqissorpai.
- Qitornanniinnaanngitsoq, aammali allanit soorlu kitaamiusut oqaasilinnit iluaqutigineqarsinnaasunik tunniussaqarusullunga taakkua pingasut atuakkiaraakka, siger Lotte Maré Christensen, Lotte Maré Christensen oqarpoq.
Atuakkiariinnanngikkai
Lotte Maré Christensenili atuakkiaminik saqqummersitsiinnarnianngilaq.
Radiomimi atuaasuugami nipigissaallaqqippoq. Taamaammat oqaluttuatoqqanik oqaluttuartunik immiussatoqqat tusarnaarneqarsinnaanngorlugit taakku nipigissarlugillu aaqqissorpai. Atuartut mobiliminnik QR-kode scannerukku immiussatoqqat podcastitulli tusarnaariaannanngorsinnaavaat.
- Atuartut tusarnaartullu oqaluttuatoqqanik oqaluttuartunik immiussatoqqanik tusarnaarsinnaanissaat pingaartikkakku immiussatoqqanik ilanngussaqarpunga, taamaalillutimmi oqaluttuartut nammineerlutik tusaasinnaaniassammatigik, Lotte Maré Christensen nassuiaavoq.
Taassuma oqaluttuatoqqat tunumiusut kitaamiusullu nammineq atuarlugit aamma tusarnaagassialiarai.
AAMMA ATUARUK Nalunaarusiaq nutaaq: Atuakkanik kalaallisoortunik atuartartut ikinnerusut
Tunumiut oqaluttuatoqaasa imarisaat kalaallit oqaluttuatoqaasa imarisaannit allaanerungaanngitsut, Lotte Maré Christensen oqarpoq, oqaluttuatoqammi taakku imarisaat naggueqatigiit Inuit kulturiannut tunngasuummata.
- Oqaluttuatoqqat taakku pingasut Inuit oqaluttuatoqaannut allanut soorlu Anngannguujummut Kaassassummullu assingupput. Taakkualu kinguaariinni ataasiinnarni oqaluttuatoqaaginnaratik kinguaariinnut tullernut aamma ingerlateqqissapput, taanna oqarpoq.
Tassa tunumiut oqaluttuatoqaat nunatsinni kulturikkut kingornussani tammatsaalineqartunut ilaaleqqullugit saqqummiuppai.
- Nunatta inuisa 40.000-t missaat kitaamiusoorsinnaapput. Tunumi inuit 3.000-nit amerlanerunngillat, taammaammat oqaluttuatoqaannik ingerlatitseqqiisinnaasut pisariaqarteqaavut, taanna oqarpoq.
Aamma allamik siunertaqarluni atuakkiaminik saqqummersitsiniarpoq.
PigiIiutiinnakkanik isumaqartarunnaartitserusuttoq
Lotte Maré Christensen Tunup pigiliutiinnakkanik isumaqarfigineqartarunnaarnissaa aamma siunertaralugu oqaluttuatoqqanik ingerlatitseqqiinniarluni atuakkiornermini isumannaagarpassuaqarpoq.
- Tunu nuanniitsumik nutaarsiassiissutigineqakkajummat taamaaliorpunga. Nuannersorpassuaqaraluartormi nuanniitsumik nutaarsiassiissutigineqakkajunnera qatsuppara. Taamaammaat Tunup nuannersortai kitaamiunut saqqummiukkusullugit Tunup alutornartuutai atuakkianni saqqummiuppakka, taanna oqarpoq.
Lotte inunnik Tunu pillugu pigiliutiinnakkanik isumalinnik nammineq naapitaqarnikuunngilaq, Tunuli pillugu nutaarsiassiissutigineqartartut imigassamik ajornartorsiuteqarnermut atugarliornermullu tunngakkajuppallaartut isumaqarpoq.
Tunulu allatut isigineqalerniassammat atuakkiorpoq.
- Atuakkiama pingasuusut imarisaat inuunermut tunngasorujussuupput. Taamalu avinngarutigisimasumi inuunermut tunngasunik aamma imaqaqaat. Inuiaqatigiiaqqat imigassamik ajornartorsiuteqaratik qanoq ingerlalluarsinnaanersut oqaluttuatoqqani erserpoq. Imigassaqanngilaq nalitsinnitullitullu ajornartorsiuteqanngillat, taanna oqarpoq.
Oqaluttuatoqqalli imarisaat ilaatigut ileqqorissaarnermut tunngasut ullutsinni ajornartorsiutitsinnut annikilliuutitsinnullu ilapittuutaasimasinnaasut, taanna aamma isumaqarpoq.
Lotte Maré Christensenip oqaluttuatoqqat ilitsoqqussani angajoqqaat qitornaminnut atuffassissutigisassaqqinngorlugit atuakkiarai. Inersimasunilli aamma atuagassaqqeqisut, Lotte Maré Christensen nassuiaavoq.
Atuakkiani pingasuusut 2023-mi januaarimi saqqummersissavai, taakkualu ilaatigut Nuummi Atuagkani nioqqutaassapput.
