Løkke Issittoq pillugu aallartitanngortitseriaatsimut: Allatut periuseqalissaagut
Allatut periuseqarluni Issittoq pillugu aallartitanngortitsisoqartalissaaq.
Danmarkip nunanut allanut ministeria, Lars Løkke Rasmussen (M), sakkutuut imarsiortuisa umiarsuaata Vædderenip Nuummi talittarfimmiittup saavani ippassaq pingasunngornermi oqaloqatigigatsigu taama erseqqissaavoq.
Qanorpiarli periuseqarluni aallartitanngortitsisoqartalissanersoq, Naalakkersuisut Danmarkillu naalakkersuisut Naalagaaffeqatigiit pillugit ataatsimiinnermi Attaveqaatitullu Ataatsimiititaliap ataatsimiinnerani, Nuummi ulluni makkunani pisuni, isumaqatigiissutiginngitsoorpaat.
Allatulli periuseqarluni Issittoq pillugu aallartitanngortitsisalerniarnermi aalajangersimasunik kissaateqarluni, Naalakkersuisut siulittaasuat Múte B. Egede (IA) Naalagaaffeqatigiit pillugit ataatsimiinnerup kingorna oqarpoq.
- Iluarisimaassavara Issittumi aallartitaq nunatta Issittumi aallartitarissagaa aamma. Aaqqiissutissanik allatut iliortoqarsinnaanngippat, taava uagut aamma nammineq aallartitaqartariaqarnerput eqqarsaatigisariaqarparput.
Suut isumaqatigiinngissutigaat?
Danmark Issittumeersuunngitsumik danskimilli tallimassaanik Issittoq pillugu marsimi aallartitanngortitsimmat uitsatigineqaqaaq.
- Naalakkersuisut tungaanniit Issittoq pillugu aallartitaalertussamut atatillugu qanoq isumaqarnerput oqaatiginikuuarput. Nunanut allanut tunngasunut ministeri oqaluuteqqissaarparput, Lars Løkke Rasmussenillu apeqqummut ersarissumik itigartippaatigut, Vivian Motzfeldt KNR-imut marsimi oqarpoq.
- Uagut pineqartilluta avaqqunneqassanngikkutta toqqaarusunnitsinnillu oqariartuuteqarnerput malinneqanngippat partiinut oqaloqatigiissutissatut ingerlateqqissavara, taanna apriilimi aamma oqarpoq.
Suleqatinili nunatsinneersoq, Vivian Motzfeldt, tamanna pillugu oqaloqatigilluarsimallugu nunanullu allanut tunngasunut sullissivitsik qanoq aaqqissuussaaneranik nassuiaalluarsimallugu, nunanut allanut ministeri Politiken-imut oqarpoq.
Naalakkersuisut siulittaasuatali, Múte B. Egedep (IA), taamaattoqarsorinngilaa:
- Kunngeqarfimmi Issittormiortaagaluarluta nunanut allanut ministereqarfik nunatsinnik qanoq isiginneriaaseqarnersoq peqataatitsinngitsorlu periuserisaanni erserpoq. Ersareqaaq, taanna Politiken-imut maajimi oqarpoq.
Kalaallit Nunaat sinniisuugissaassaaq
Savalimmiut, nunatta Danmarkillu naalakkersuisuisa siuttui Hans Egedep Illuani marlunngornermi tusagassiortunik katersortitsinermi akunnermik ataatsimik kingusinaarlutik sassarmata, ministeriuneq Mette Frederiksen (A) Issittoq pillugu aallartitanngortitsinerup oqallisigiinnarnissaanik periarfissiivoq:
- Nunanut allanut ministereqarfik pisarnermisut sulivoq. Ileqqoqarnerliuna ataatsimoorluta maanna allanngortinniarsariniariopput. Suliarlu taanna suli naammassinngilaq, taanna oqarpoq.
Nunanullu allanut ministeri, Lars Løkke Rasmussen (M), ippassaq pingasunngornermi ualigaa tamatumunnga tapersiivoq:
- Allatut periuseqalissaagut. Tamanna qularnanngilaq. Naalagaaffeqatigiit tamaasa ataqqillugit eqqartueqatigeeqqiillutalu aaqqiissalluta isumaqatigiippugut, taanna KNR-imut oqarpoq. Taamaaliornermili Danmarkip inatsisaa tunngaviusoq taamaaliornermi naapertorneqassasoq, taanna aamma erseqissaavoq.
Kisiannimi Kalaallit Nunaat Danmarkilu suleqatigiinnerat pitsaanerusumiit annermik pitsaannginnerusunngorsimasoq, Múte B. Egede Politikenimut oqarpoq. Kalaallit Nunaannik Issittoq pillugu aallartitanngortitsinermi peqataatitsinnginnersi kukkunerusutut isigaajuk?
- Illit oqarnittut attaveqatigiinneq allanngoriartorsimappat, taava ulluni makkunani Kalaallit Nunaanniiffitsinni ajornartorsiutit oqaloqatigiissutigigatsigit illuanut sangujartoqqissimasoq isumaqarpunga, taanna oqarpoq nangillunilu:
- Taamaammanuna apeqqutinik Amerik Avannarlermut Issittumullu tunngasunik suliaqarsinnaasumik akisussaassuseqartumik nunanut allanut ministereqarfeqarnissaa qanoq iluarsissanerlugu maanna eqqarsalertugut. Kalaalit Nunaatalu nammineq sinniisugissaarnissaa suleriaatsimi qulakkiissagipput.
