Løkke issittoq pillugu aallartitaq pillugu: Vivian Motzfeldt tamanna pillugu nammineq oqaloqatigissavara
Danskit nunanut allanut tunngasunut ministeriata, Lars Løkke Rasmussenip (Moderaterne) Danmarkip issittoq pillugu allartitaqarnissamut danskimik aallartitamik toqqaasimanerata isornartorsiorneqarnera naatsumik oqaaseqarfigaa.
Nunanut allanut tunngasunut naalakkersuisup, Vivian Motzfeldtip (S) parteeqataatalu Folketingimut ilaasortap, Aki-Matilda Høegh-Damip aallartitap issittumeersuusariaqaraluarneranik oqaaseqarnerata kingunerisaanik tamanna pivoq.
Lars Løkke Rasmussenili KNR-imut naatsumik ima akissuteqarpoq:
- Tamanna Vivian Motzfeldtimut toqqannartumik oqaluusererusunneruara. Pitsaasumik qanimullu oqaloqatigiilluartarpugut – aamma apeqqut uani qaqitaa pillugu.
Issittoq pillugu aallartitassap issittumit kingoqqisuunissaa siunnersuutigineqarsimagaluartoq, Nunanut allanut tunngasunut, Inuussutissarsiornermut Niuernermullu Naalakkersuisoqarfiup KNR-imut paasissutissiissutigaa. Tamannali Vivian Motzfeldtip oqarnera naapertorlugu Lars Løkke Rasmussenimit itigartitsissutigineqarpoq.
- Naalakkersuisut tungaanniit Issittoq pillugu aallartitaalertussamut atatillugu qanoq isumaqarnerput oqaatiginikuuarput. Nunanut allanut tunngasunut ministeri oqaluuteqqissaarparput, Lars Løkke Rasmussenillu apeqqummut ersarissumik itigartippaatigut, Vivian Motzfeldt oqarpoq.
Nunanut allanut tunngasunut ministereqarfik: Ministereqarfiup iluani pisortatut atuuffik
Nunanut allanut tunngasunut ministereqarfimmi issittoq pillugu aallartitamik tallimassaa atuuttoqalerpoq.
Kingullermik Tobias Elling Rehfeld atuuffimmut toqqarneqarpoq. Taanna Afrikap kujataani danskit aallartitaatut atuuffimmeerpoq, taassumalu Thomas Winkler taarserpaa.
Issittoq pillugu aallartitaq Københavnimi Nunanut allanut tunngasunut ministereqarfimmi allaffeqartarpoq, taassumalu Issittoq Amerika Avannarlerlu pillugit allaffiit qullersaaffigalugit.
Aallartitattaaq kunngeqarfiup Savalimmiut Kalaallit Nunaatalu ataatsimut nunanut allanut tunngasunut politikkiannik aamma USA-mut Canadamullu atassuteqarnerannik ataqatigiissarineq suliassarai.
Nunanut allanut tunngasunut pisortatut atuuffinnut allanut toqqaanermi malittarisassat atorneqartartut assigalugit Issittoq pillugu aallartitassamik toqqaasoqartoq, Nunanut allanut tunngasunut ministereqarfiup KNR-imut paasissutissiissutigaa.
Tamannalu Kunngeqarfiup Issittumut atatillugu nunanut allanut tunngasunut politikkiannik ataqatigiittoqarnissaanut, nunanut allanut tunngasunut ministereqarfiup qulakkeerinneqataasorigaa, Nunanut allanut tunngasunut ministereqarfik KNR-imut mailikkut allappoq.
