Maligassiuisut show: Lissi Ottosen timersullammanngorpoq
Nersornaasiisoqarpoq, nipilersukkanik nuannersunik atuisoqarluni minnerunngitsumillu timersuutinik assigiinngitsunik takutitsisoqarluni Nunatsinni timersornermi nersornaatit kulturip illorsuani Katuami agguaanneqarmata KNR-TV-mi toqqaannartumik aallakaatinneqartumi.
Timersullammattut toqqarneqartoq tassaavoq Lissi Ottosen Nuuk Shotokan karate-do-meersoq ukiorpassuarni sungiusaasuunermi saniatigut 2025-mi unammisartutut angusarissaaqisoq. Imminut illersorluni timersuummi shotokan-karatemi Europami pissartanngorniuttoqarnerani marlunnik kuultinnappoq.
Imminut illersornissamut timersuut alla aamma nersornaatisissutaavoq. Taekwondortartoq Lars Lennert Abelsen Elite Sport Greenlandip pikkorivissuni angusarissaartumut nersornaataanik tunineqarpoq. Taanna nunani tamalaani pingaartumik unammeriaatsimi tul-imi angusarissaartarpoq Europamilu 2025-mi pissartanngorniunnermi bronzennalluni.
Nersornaasiinermi timersornermi tunuliaqutsiilluartut aamma nersorneqarput. Aalajaallutik sulilluartut timersortartut sungiusarnermik unammiartornernillu ukkassilluarnissaannut aqqutissiuussisarput.
Inuusuttunik inerisaaneq
Anni Damgaard B-67 badmintonimi ukiuni 50-nngulersuni siulittaasoq GIF-ip aqutsisutsialammut nersornaataanik tunineqarpoq. Taanna B-67-ip sulortartuini ukiuni qulikkaani arlalinni qitiulluinnarpoq unamminernik aaqqissuussinerni aamma peqatigiiffiup ilaasortaasa unammiartornerminni atugarissaartarnissaanik ilungersuuteqartuulluni.
Kinguaariillu tulliit timersornermi ilisimasarialippassuarnik tuniorarneqarnerani sungiusaasut piginnaasaqarluartut pinngitsoorneqarsinnaanngillat. Piukkunnaatilinnik ineriartortilluartunut nersornaat sungiusaaqatigiittartunut Patrick Otiri Frederiksenimut aamma Nick Reimerimut B-67-mi aamma inuusuttuni nunanut allanut unammisartuni suliartik pillugu nersornaaseqarput.
Peqatigiiffikkaartumik timersuutini allani aamma suliniartoqarluarpoq. Meeqqanut inuusuttuaqqanullu volleyballimi I-69-mi Ilulissaneersumi sungiusaasoq Hansiinannguaq Siegstad GIF-ip sungiusaasutsialammut nersornaataanik tunineqarpoq. Taanna meeqqanik toqqissisimatitsisarpoq aamma sungiusarnermi nuannisarfiusumik ataatsimoornermik pilersitsisarluni.
Timimik aalatitsinerulernissaq anguniarlugu suliniarnermi suleriutsimik Gamemik taaguusikkamik illoqarfinni arlalinni aallartitsivoq. Suliniut taanna aqqutigalugu inuusuttut ineriartornissamut piareersimalluartut nersornaaserneqarput Faxe Kondip nersornaataanik taaguuteqartumik.
Ukioq manna taamatut nersornaaserneqartoq tassaavoq Peter Davidsen timersoqatigiiffimmi Kâgssagssummersoq aamma suliniummi Gamemi suliniarluartoq.
Maligassiuisut show uani isiginnaaqqissinnaavat.
