Mette Frederiksenip Jens-Frederik Nielsenillu Berlin Parisilu tikeraassagaat
Naalakkersuisut siulittaasuat Jens-Frederik Nielsen (D) aamma danskit ministeriunerat Mette Frederiksen, "nunanut allanut politikkimi pissutsit massakkut atuuttut" oqaloqatigiissutiginiarlugit, marlunngornermi Berlinimiipput.
Ministeriuneqarfik tusagassiuutinut nalunaarummi taama allappoq.
Berlinimi tikeraarnermi "Europap nukittunerulernissaata pisariaqarnera" aamma eqqartorneqassasoq, tusagassiuutinut nalunaarummi allaqqavoq.
Berlinimiit Parisiliassapput, Frankrigip præsidentia Emmanuel Macron tassani ataatsimeeqatigissallugu.
Præsidentip pingasunngornermi ulloqeqqasioqatigiinnissamut taakkua qaaqqugai, nutaarsiassaqartitsiviup AFP-ip nutaarsiassiinera naapertorlugu, præsidentip allaffianit nalunaarutigineqarpoq.
Danmark Kalaallit Nunaallu taakkualu namminneq oqartussaassuseqarnerat ataatsimullu killeqarfeqarnerat Frankrigip tapersersoraa, Macronip ataatsimiinnermi erseqqissaqqissagaa præsidentip allaffianit nalunaarutigineqarpoq.
Tysklandimut Frankrigimullu tikeraarneq - nunanut marlunnut Europami pissaaneqarnerpaat akornaniittunut - pivoq, USA-p præsidentiata Donald Trumpip USA-p Kalaallit Nunaat pisariaqartikkaa erseqqissaqqereeraalu.
Naalakkersuisuisut allat siulittaasuinik ataatsimeeqateqarneq
Mette Frederiksen aamma Jens-Frederik Nielsen naalakkersuisuunerit ataatsimiinnerannut Welt Economic Summit-imut, aningaasaqarneq nunallu immikkoortui pillugit politikkimut tunngasumut, Tysklandimi illoqarfiit pingaarnersaanniinnerminni peqataassapput. Tysklandip naalakkersuisui tassunga aamma peqataassasut, Ministeriuneqarfik allappoq.
Mette Frederiksenip Jens-Frederik Nielsenillu Macronimik ullup qeqqasioqateqarnissaata saniatigut universitetimi Sciences Po-mi oqaloqatigiinnissamut peqataassapput.
Oqaloqatigiinneq atuakkiortumit Giuliano da Empolimit, "Rovdyrenes tid"-imik atuakkiortumit aqunneqassaaq. Atuakkami allaaserineqarpoq inuit oqartussaaqataanerisa teknologip ukiuni kingullerni ineriartornerata ilungersunartorsiortitaalernera, tamatuma nassataralugu teknologimik tunngasunik suliffeqarfissuit politikerillu politikikkut aqutsinermi inuit oqartussaaqataanerinut qimatsiartuaarnerat, pissaaneq eqiterneqalerluni pisinnaatitaaffinnillu killeqartitsilerluni.
Mette Frederiksenip Kalaallit Nunaat sapaatip akunnerani kingullermi tikeraarpaa, tikeraarnerminilu Kalaallit Nunaannut pisut kingulliit nassuiaateqarfigalugai.
Mette Frederiksen nunatsinnut tikinngitsiartoq Donald Trump oqarpoq Natollu qullersaa Mark Rute Kalaallit Nunaat pillugu isumaqatigiissummik immersugassamik isumaqatigiissuteqarsimallutik.
- Suli ilungersunartorsiorpugut, Amerikamiulli isumaqatigiissusiorfigissallugit piareersaateqarpugut. Oqartuartarpugut isumaqatigiissummik allassalluta. Tamannalu pillugu maani Nuummi ataatsimiissutigaarput, ministeriuneq tallimanngormat oqarpoq.
/ritzau/
