Lidegaard: EU-p puisit pillugit peqqussummik sukateriniarnera Kalaallit Nunaannut ajoqutaasinnaavoq

Danskit nunanut allanut tunngasunut ministeriat Martin Lidegaard, Folketingimi ilaasortap IA-meersup Johan Lund Olsenip EU-Kommissionip EU-p iluani puisinik nioqqutissianik nioqquteqarnermut malittarisassanik nutaanik sukannernerusunillu eqqussinissamik siunnersuutaa pillugu § 20 naapertorlugu apeqquteqaataanut akissuteqarluni taama allappoq.

Martin Lidegaard isumaqarpoq EU-p puisit pillugit peqqussutaa maanna atuuttoq 2009-meersorlu naggueqatigiinnut Inunnut nunat inuiinullu allanut kingunerlutsitsereersoq, naak naggueqatigiit Inuit allatut pineqarnissaat aalajangersarneqarsimagaluartoq. Taamaammat EU-Kommissionip sukateriniarnera akueriuminaatsippaa.

AAMMA ATUARUK Naalakkersuisut: EU-p puisinut peqqussutaa sukateriffigineqartariaqanngilaq

Kalaallit Nunaannut kingunerlutsitsinerusinnaavoq

- Taamatut siunnersuuteqartoqarneratigut Kalaallit Nunaata puisinik nioqqutissianik EU-mut nioqquteqarneranik killiliissaaq, malitsigissanillu nunat allat assingusunik siunnersuuteqassagaluarpata suli annerusumik Kalaallit Nunaannut kingunerlutsitsissalluni, Martin Lidegaard taama allappoq.

Aammattaaq oqaatigaa EU-mut erseqqissaatigineqarsimasoq paasissutissiineq annertusineqartariaqartoq Kalaallit Nunaannilu puisinniartarnerup paatsoorneqarsimanera iluarsillugu, puisinik tunisassiat Kalaallit Nunaanneersut atuisartunit tatigineqaleqqinnissaat anguniarlugu.

Danskit nunanut allanut ministereqarfiata Avatangiisinullu ministereqarfiata EU-mi sullissiviit attuumassuteqartut qanittumik oqaloqatigigaat aamma oqaatigaa, Kalaallit Nunaanni oqartussaasut peqatigalugit Kalaallit Nunaata soqutigisai isumaqatigiinniarnerni ingerlanneqartuni isumagineqarniassammata.

AAMMA ATUARUK Chemnitz Larsen: EU-p puisinut tunngasunut sukaterinera Naalakkersuisut arajutsivaat?

AAMMA ATUARUK Doris Jakobsen: Puisit amiinik avammut niuernerput EU-p akornuseqqinniarpaa

- Kalaallit Nunaanni Naalakkersuisut suliaq pillugu arlaleriarlunga eqqartueqatigaakka, Kalaallit Nunaatalu nunap inuiisut pisinnaatitaaffeqarneranut tunngatillugu EU-p pisussaaffeqarnera attatiinnarneqartariaqartoq aammalu Kalaallit Nunaata puisinik tunisassianik EU-mut nioqquteqaannarsinnaanissaa qulakkeerneqassasoq isumaqatigiissutigaarput, Martin Lidegaard taama allappoq.

EU-Kommissionip siunnersuutaa EU-mi kingusinnerpaamik ukiormanna oktobarip 18-iani aalajangiiffigineqartussaavoq.