Doris Jakobsen: Puisit amiinik avammut niuernerput EU-p akornuseqqinniarpaa
![](/sites/default/files/styles/image_934x467/public/user_pictures/OvereemMikkelvan_Tasiilaq__saelfangst_i_syd_for_isortoq.jpg?itok=M2B7C4JS)
Tassami EU-Kommissioni puisit amiinik eqqusseqqusinnginnerminnut atatillugu naggueqatigiit Inuit amiutaannik eqqussisoqarsinnaaneranut allangortitsinissamut nutaamik missingersuusiorpoq.
Allannguutissatut siunnersuut uani atuarneqarsinnaavoq.
Allannguutissatulli siunnersuut kalaallit piniartuinut inussiarnersuunngilaq.
AAMMA ATUARUK WWF-ip puisinniarneq akueraa EU-mullu piumasaqaateqarluni
Siumup folketingimi ilaasortaatitaa Doris Jakobsen isumaqarpoq, EU-p puisit amiinik eqqussinissaminut puisit pisarineqartut neqaasa tamakkerlutik nerineqartarnissaannik piumasaqarniarnera akuerineqarsinnaanngitsoq.
- EU-Kommissionimi aamma isumaqarput, soorlu puisit aallaammik aallaallugit pisarisaratsigik ernumanartuusoq, taakkumi oqaatigaat, puisit taamaalillutik pisariaqanngitsumik anniartinneqartartut uippakajaartinneqartartullu. Uumasut nujuartat aallaaneqaqqusaanngippata qanoq toqunneqartarnissaat EU-mit qanoq takorloorneqarnersoq naluara. Uumasummi nujuartat uumasuusivimmi paaqqutarineqanngillat. EU-Kommissionip siunnersuutaa najoqqutaralugu puisinik pisaqarsinnaanissamut akuerineqarsinnaasumik periaatsimik nassaassaqanngilaq, Doris Jakobsen oqarpoq.
Taassuma ilanngullugu oqaatigaa, tamanna pissuserissaarnissamik isummat uniorlugit iliuuseqarneruvoq kinaassusersiornerullunilu. Doris Jakobsenimmi oqaatigaa Europami aallaaniarsinnaaneq EU-mit inerteqqutiginiarneqanngilaq. Europamimi aallaaniartartut tuttorsuit, tuttorpaat, tuttut, puulukit nujuartat uumasullu allat aallaasinik aallallugit pisaqartarmata.
- Isumaqarpunga nunat EU-mut ilaasortaasut nunanik issittuniittunik qanoq suleqateqarusunnertik eqqarsaatigilluartariaqaleraat. Namminneq amminik meqqulinnik tunisassiornertik illersorniarlugu tamakkuninnga niuernikkut akornusersuiniarneq suleqatigiinnissamut siuarsaataanngilaq. Aamma Danmarkimi naalakkersuisut EU-p Issittumi Siunnersuisoqatigiinni alaatsinaatsutut ilaasortanngornissaanik tapersersuinertik nalilersoqqittariaqarpaat, Siumup folketingimi ilaasortaatitaa Doris Jakobsen ilanngullugu taama oqarpoq.