Ammanerulersitsineq Peqqinnissaqarfimmut akisussaaq
Suliffeqarfinni immikkoortortat suliaqarfiillu akorngini attaveqaatersorneq akisunerulissaaq. Lan linkimimmi atuinermut akit annertuumik qaffanneqassammata.
Taamatut iliornissaq suliffeqarfinnut anginerusunut eqquissaaq, soorlu aamma Dronning Ingridip napparsimmavissua eqqugaassaaq, tassanimi sulisut nakorsat peqqissaasullu angerlarsimaffimminniit sulisarmata.
Siornatigut assersuutigalugu sekundtimut 4Mbitimik lan linkimik atuinermut 250 koruuninik akeqarpoq. Maanna aki qaffassaaq oktobarip aallaqqaataaniit 750 koruuninngorluni. Taannaavormi telep tunngaviusumik aningaasartuutigisartagai.
Immikkoortaqarfinnut attavilersuutaavoq
Nutaanik akeqartitsilerneq peqqinnissaqarfimmut eqquinngitsoornavianngilaq, lan linkimik annertuumik atuiffiummat:
- Peqqinnissaqarfiup iluani suleqatigiittoqassappat, pingaaruteqarluinnarpoq kigutileriffiit, peqqissaasut, sulisunut tunngasunut allaffeqarfiit imminnut attaveqaqatigiinniissaat, Lan linksillu atorlugit tamanna piviusunngortittarparput, Peqqinnissaqarfimmi IT-lerisut ittuat Bruno Juel Pedersen oqarpoq.
Periarfissanik allanik misissuisoqartoq
Taassuma oqaluttuaraa maanna peqqinnissaqarfiup angissutsit assigiinngitsut atorlugit, qanoq atorfissaqartiginerilu apeqqutaatillugit, lan linkimik attaveqaatit 50-niit 60-it tungaanut atorneqartartut.
Taamaattumik akigititassat nutaat annertuumik peqqinnissaqarfimmut eqquissapput. Taamaalillutik maanna periarfissaasut allat takkuttu misissorneqaleruttorput.
Aamma atuaruk Angerlarsimaffimmit sulisartut ammanerulersitsinermi eqqugaassapput
Aamma atuaruk Mobilinik atuisut internettimut akileeqataasarput
Peqqinnissaqarfiullu maannakkuugallartoq akigititat nutaat qanoq kinguneqavissanersut ilisimanngilaat, kisianni akisunerulernissaat qularineqanngilaq.
- Lan linkimut akit qaffassagaluarpata, allannut atukkatsinnut akissakinnerulissaagut. Soorlu pisiassanut nutaanut, aammalu aqqutitsinnut datamik atuinernut annertusaaqqinnissamut akissaarutissaagut, Peqqinnissaqarfimmi IT-lerisut ittuat Bruno Juel Pedersen oqarpoq.
